Њујорк, 9 ноември 2024 (МИА) – Најдобриот кошаркар на Милвоки бакс, Јанис Адетокунбо, изрази незадоволство од играта на тимот ноќеска на гостувањето кај Њујорк никс.

Бакс изгубија со 116:94 во меч во кој домаќините беа далеку подобри не дозволувајќи противникот да се понадева на успех.

- Дефинитивно не сум задоволен со вакво издание. Мораме барем да си дадеме шанса. Стигнавме во Њујорк по одличната игра на претходниот наш натпревар ден порано. И така доаѓаме овде, губиме со 30 разлика. За два дена ќе го имаме ривал шампионот Бостон. Ако не се бориме на теренот, повторно ќе загубиме со 30 разлика, изјави Адетокунбо.

Поразот од 94:116 беше седми за Милвоки во девет натпревари оваа сезона во НБА-лигата.

- Никој нема да ни подари победи во НБА. Никој нема да не жали. Мора да гинеме на теренот во секој сегмент. Денес воопшто не се боревме за победа, додаде грчкиот кошаркар.

НБА шампионот од 2021 година, во моментов со биланс две победи и седум порази се наоѓа на 13.место во Источната конференција. зс/

Фото: ЕПА