Kiev, 6 nëntor 2024 (MIA) - Presidenti i Ukrainës, Volodimir Zelenski deklaroi se konfrontimet e para të ushtrisë ukrainase me ushtarët e Koresë së Veriut kanë hapur rrugën për paqëndrueshmëri të mëtejshme në botë.

"Betejat e para me ushtarët e Koresë së Veriut hapën një kapitull të ri të destabilitetit në botë", tha lideri ukrainas në fjalimin e mbrëmshëm.

Përplasja mes forcave të Ukrainës dhe Koresë së Veriut u konfirmua edhe nga ministri i Mbrojtjes, Rustem Umerov në një intervistë për televizionin e Koresë së Jugut.

Agjencia e inteligjencës ukrainase raportoi më parë se rreth 12.000 ushtarë të Koresë së Veriut, duke përfshirë 500 oficerë dhe tre gjeneralë kishin arrit në Rusi, ndërsa stërvitja zhvillohet në pesë baza ushtarake.

Zelenski ka kritikuar mungesën e reagimit të Perëndimit ndaj Rusisë pasi përfshiu trupat e Koresë së Veriut në luftë.

Të enjten, ai tha se reagimi i dobët nga bashkësia ndërkombëtare mund të inkurajojë presidentin rus Vlladimir Putin të rrisë atë prani ushtarake.

Zelenski filloi të paralajmërojë për praninë e trupave të Koresë së Veriut në Rusi më 13 tetor. Aleatët perëndimorë e quajtën atë një përshkallëzim të madh, por nuk u përgjigjën me masa dhe nuk paralajmëruan se do ta bënin këtë.

"Mijëra ushtarët e parë nga Koreja e Veriut janë afër kufirit me Ukrainën. Ukrainasit do të detyrohen të mbrohen kundër tyre", ka thënë Zelenski gjatë fundjavës. "Dhe bota thjesht do të shikojë përsëri", shtoi ai.

Ai ka thënë se Ukraina ka të dhëna të sakta për të gjitha lokacionet ku janë vendosur ushtarët e Koresë së Veriut në Rusi. Por siç tha ai, "aleatët perëndimorë nuk i kanë ofruar Ukrainës armët me rreze të gjatë veprimi për të sulmuar ato caqe".

"Në vend të aftësisë shumë të nevojshme me rreze të gjatë veprimi, Amerika po shikon, Britania po shikon, Gjermania po shikon", ka thënë ai.

foto: "X"