Lubjanë, 19 nëntor 2024 (MIA) - Zonja e parë e Ukrainës, Olena Zelenska sot së bashku me studentë dhe profesorë ukrainas ka vizituar Universitetin e Lubjanës, por për shkaqe të panjohura ka anuluar ligjëratën e paralajmëruar në Fakultetin e Shkencave Shoqërore.

Siç njofton Agjencia Sllovene e Lajmeve (STA), ende nuk ka asnjë përgjigje nga Ambasada e Ukrainës në Slloveni për shkaqet e anulimit të fjalimit të Zelenskës.

Një pjesë e mediave sllovene publikuan se një incident i vogël ka ndodhur pasi një burrë bërtiti se Rusia do ta fitonte luftën në Ukrainë. Ai është identifikuar nga policia, por ende nuk dihet nëse ndaj tij do të ngritet procedurë.

Zelenska në Slloveni ka arritur dje, kur lëvizja proruse "Sllovenia kundër rusofobisë" mbajti një protestë para fakultetit.

Gruaja e presidentit ukrainas e ka vizituar Lubjanën me ftesë të presidentit të Sllovenisë, për të marrë pjesë në takimin vjetor të bordit të këshilltarëve të ITF-së "Përmirësimi i sigurisë së njeriut" (Enhancing Human Security), ku siç u paralajmërua do të prezantohen nevojat humanitare të Ukrainës. rq/

Foto: arkivi i MIA-s