Bruksel, 30 korrik 2023 (MIA) – Pas stagnimit në fillim të vitit, rritja në Eurozonë ka gjasa të mbetet e kufizuar deri në fund të vitit 2023, duke bërë që parashikimi për rritjen ekonomike vjetore që pritet në shtator të jetë më pak optimist, se parashikimet e qershorit, tha Komisioneri Evropian për Ekonominë, Paolo Xhentiloni.

Në qershor, Komisioni Evropian parashikoi rritje të ekonomisë së Eurozonës në vitin 2023 prej 1.1 për qind, por sipas njoftimit të Xhentilonit, parashikimet e reja që do të publikohen më 11 shtator ka të ngjarë të tregojnë rritje më të ulët se ajo që pritej.

Një optimizëm i tillë i reduktuar për rritjen ekonomike vjen si pasojë e rritjes së kostove të huamarrjes, rënies së besimit të biznesit dhe konsumatorëve, si dhe inflacionit të lartë, i cili, pavarësisht uljes, ka ende një normë të lartë.

Sipas analistëve, e gjithë kjo tregon se edhe qytetarët e BE-së do të përballen me kosto të larta jetese këtë dimër që po vjen, rritja e të cilave filloi me pandeminë e Kovid-it, e më pas vazhdoi me pushtimin rus të Ukrainës.

Banka Qendrore Evropiane (BQE) ngriti të enjten normën bazë të interesit në 3.75 për qind, norma më e lartë që nga futja e euros në vitin 1999, në përpjekje për të ulur inflacionin e lartë. Një normë kaq e lartë ka ndikuar edhe në normat e interesit të bankave, që paraqet një kosto shtesë për qytetarët që kanë kredi, por në të njëjtën kohë mbyt rritjen.

Kryetarja e BQE-së, Kristin Lagard tha se ka mundësi që kjo të jetë rritja e fundit e normës së interesit këtë vit për shkak të rrezikut të recesionit, por se asgjë nuk mund të thuhet me siguri përpara takimit të radhës të krerëve të vendeve të bankave qendrore në shtator.

Qëllimi i rritjes së normave të interesit është të stimulojë bizneset dhe familjet të kursejnë më shumë dhe të shpenzojnë më pak, gjë që zakonisht ngadalëson rritjen ekonomike.

Normat e larta të interesit u shpërblyen në betejën me inflacionin, i cili u lehtësua në 5.5 për qind në qershor, gati dyfishi i normës që goditi në tetor të vitit 2022, kur arriti nivelin rekord.

Normat e larta të interesit rezultuan edhe me ulje të volumit të kredive të marra nga subjektet private, vlera e të cilave në tremujorin e dytë të këtij viti arriti në një nivel historikisht të ulët, si dhe rënie të kërkesës për kredi nga individët.

Në tremujorin e fundit të vitit 2022, ekonomia e Eurozonës shënoi rënie dhe vetëm falë rezultateve të mira statistikore të Irlandës, një trend i tillë u zbut në tremujorin e parë të këtij viti. Rezultatet për rritjen ekonomike në tremujorin e dytë pritet të shpallen nesër dhe sipas analistëve nuk ka gjasa të lënë vend për shumë vetëkënaqësi.

Treguesi kryesor i ndjenjës ekonomike në Eurozonë, indeksi i besimit të biznesit dhe konsumatorit, ra me 0.8 pikë indeksi, në 94.5 në muajin korrik. Rënia vjen më së shumti nga rënia e indeksit të besimit në Francë me 2.3 pikë indeksi dhe në Gjermani me 2.1 pikë.

Fondi Monetar Ndërkombëtar rishikoi parashikimin e tij për rritjen vjetore globale që është në rënie këtë javë, ndërsa parashikoi një rritje prej 0.9 për qind për Eurozonën. Nga ana tjetër, Instituti Kil për Ekonominë Botërore parashikoi se Gjermania, ekonomia më e fuqishme në BE dhe në eurozonë, do ta mbyllë vitin në një recesion të butë, me rënie të prodhimit me 0.3 për qind. Kjo gjendje e ekonomisë gjermane padyshim do të ketë efekte negative në kërkesën në Evropë.

Megjithatë, me gjithë dy ritme të njëpasnjëshme negative të rritjes ekonomike tremujore, të cilat teknikisht e futën Eurozonën në recesion, ajo ishte ende më e ulët se ç'pritej, kryesisht falë paketave stimuluese fiskale dhe ndihmës nga fondet e BE-së që mbajtën nivelet e larta të kërkesës dhe punësimit të lartë.

Ekonomisti në “Goldman Saks”, Filipo Tadei, vlerësoi se pavarësisht rishikimeve në rënie të parashikimeve të rritjes ekonomike për vitin 2023, Eurozona do të vazhdojë ta mbyllë vitin me "rritje të ulët, por jo në recesion".

Foto: Arkivi i MIA-s