Pragë, 27 dhjetor 2023 (MIA) - Policia çeke tha sot se ka gjetur një letër nga studenti që vrau 14 persona në të shtënat e 21 dhjetorit në Universitetin e Karlit në Pragë, në të cilën ai pranoi se më parë kishte vrarë një burrë 32-vjeçar dhe një foshnjë dy muajsh në pyllin e Klanovicës.

"Gjatë kontrollit në shtëpinë e tij është gjetur një letër lamtumire. Ai e shkroi atë para se të kryente vrasjet. Në të, ai pranoi se e kishte kryer vrasjen në pyllin e Klanovicës", tha zëdhënësi i policisë Jan Danek, raportojnë mediat çeke.

Detajet e atij krimi nuk janë bërë të ditura dhe testet balistike kanë përcaktuar se arma e përdorur në pyllin e Klanovicës ishte e njëjta që u gjet në shtëpinë e vrasësit.

Vrasja e burrit dhe foshnjes së tij dy muajsh ndodhi më 15 dhjetor kur ata ishin duke ecur në një pyll pranë Pragës.

Në të shtënat masive në Universitetin e Karlit në Pragë, studenti 24-vjeçar Dejvid Kozak vrau 14 persona dhe plagosi 25 të tjerë përpara se të vriste veten. sa/

foto: Arkivi i MIA-s