Bruksel, 25 prill 2024 (MIA) - Komisioneri Evropian për Zgjerim dhe Politikë të Fqinjësisë, Oliver Varheji sot ka falënderuar Parlamentin Evropian për vendimin e djeshëm për miratimin e Rregullores për krijimin e Mekanizmit për reforma dhe rritje në Ballkanin Perëndimor.

"Faleminderit nga Parlamenti Evropian për bashkëpunimin shumë të mirë që çoi në miratimin e fondeve për reforma dhe rritje prej gjashtë miliardë euro", theksoi Varheji në një njoftim në Iks. 

Ai më tej thekson se kjo paraqet një marrëveshje të balancuar për një instrument të paprecedentë që do të ndihmojë Ballkanin Perëndimor "të rritet më shpejt dhe të përgatitet për anëtarësimin në BE". 

 "Menjëherë e kemi vënë në funksionim", shtoi Varheji në njoftim.

 Siç njofton korrespondenti i MIA-s nga Brukseli, Parlamenti Evropian dje me 517 vota "për", 56 "kundër" dhe 30 "abstenime" e mbështeti miratimin e Rregullores për krijimin e Mekanizmit për reforma dhe rritje në Ballkanin Perëndimor,  i cili është instrument financiar për zbatimin e Planit për rritjen e rajonit.

 Plani për rritjen e Ballkanit Perëndimor duhet të sigurohet forcim ekonomik të vendeve të rajonit,  inkurajim të reformave të tyre të brendshme dhe  tërheqje të investimeve, në mënyrë që ato shumë shpejt t'i ndjejnë  përfitimet e afrimit ndaj  BE-së dhe në të njëjtën kohë. mund të çojë edhe në dyfishimin e ekonomive të tyre në 10 vitet e ardhshme.

Në kuadër të Mekanizmit për periudhën  nga viti 2024 deri në vitin 2027 për vendet e Ballkanit Perëndimor janë parashikuar gjashtë miliardë euro, nga të cilat dy miliardë euro janë grante të pakthyeshme dhe katër miliardë euro janë kredi me kushte të volitshme. Nga shuma e përgjithshme, të paktën 800 milionë euro do të parashihen për Maqedoninë e Veriut.