Kiev, 12 prill 2023 (MIA) - Ushtria e Ukrainës e ka hedhur poshtë si të rremë pretendimin e Rusisë se kontrollon 80 për qind të Bahmutit, duke thënë se forcat ukrainase kontrollojnë "dukshëm më shumë" se 20 për qind të qytetit në lindje të vendit.

Themeluesi i kompanisë ushtarake private ruse Vagner Jevgenij Prigozhin tha më parë se forcat e tij po përparonin për të kapur Bahmutin dhe kontrollonin 80 për qind të qytetit.

Rusia beson se kapja e Bahmutit do të hapë mundësinë e ofensivave të ardhshme në të gjithë Ukrainën, ndërsa Kievi dhe Perëndimi thonë se qyteti i shkatërruar ka vetëm kuptim simbolik.

Komandanti i forcave tokësore të Ukrainës, Oleksandar Sirski, tha më herët dje se rusët në Bahmut kanë filluar të përdorin taktikat e "tokës së djegur" që përdorën në Siri dhe shtoi se situata në qytet është e vështirë, por nën kontroll.

"Armiku kaloi në të ashtuquajturën taktikë “toka e djegur siriane”. Ata shkatërrojnë ndërtesa dhe pozicione me sulme ajrore dhe zjarr artilerie. Mbrojtja e Bahmutit vazhdon. Situata është e vështirë, por nën kontroll, tha Sirski.

Sirski theksoi se ushtarët ukrainas i lodhën anëtarët e grupit paraushtarak rus Vagner, kështu që Rusia u detyrua të përfshijë forcat speciale dhe njësitë ajrore në betejën për Bahmut.

Përndryshe, "toka e djegur" është një emër për një strategji ushtarake në të cilën gjithçka që mund të jetë e dobishme për armikun shkatërrohet qëllimisht gjatë tërheqjes. ls/

Foto: Gugëll map