Uashington, 14 shtator 2024 (MIA) - Presidenti amerikan Xho Bajden dhe kryeministri britanik Kir Starmer në takimin e mbrëmshëm në Uashington nuk morën një vendim për të lejuar Ukrainën të përdorë raketa me rreze të gjatë veprimi për të shënjestruar Rusinë, raporton Bi-Bi-Si.

Më herët, presidenti rus Vladimir Putin paralajmëroi Perëndimin që të mos lejojë Ukrainën të lëshojë raketa me rreze të gjatë veprimi ndaj Rusisë. Putini tha se një veprim i tillë do të nënkuptonte përfshirje të drejtpërdrejtë të NATO-s në luftën në Ukrainë dhe se do të përgjigjet në përputhje me rrethanat.

Shtetet e Bashkuara të Amerikës dhe Britania e Madhe aktualisht nuk po i japin Ukrainës leje për të përdorur raketa me rreze të gjatë veprimi kundër objektivave në Rusi, pikërisht për shkak të frikës nga përshkallëzimi.

Presidenti ukrainas Volodimir Zelenski u ka bërë thirrje vazhdimisht aleatëve perëndimorë që të japin leje, duke theksuar se kjo është mënyra e vetme për t'i dhënë fund luftës. Kievi pretendon se duke mos lejuar të shënjestrojë bazat në Rusi nga të cilat nisin sulmet ndaj Ukrainës, pengohet aftësia e Ukrainës për t'u mbrojtur.

Mbretëria e Bashkuar, pas pushtimit të forcave ukrainase në rajonin e Kurskut të Rusisë muajin e kaluar, tha se Ukraina "ka të drejtë" të përdorë armët e furnizuara nga Britania për "vetëmbrojtje", gjë që "nuk përjashton operacionet në territorin e Rusisë".

Megjithatë, kjo përjashton përdorimin e raketave me rreze të gjatë Storm Shedou në territorin jashtë kufijve të njohur ndërkombëtarisht të Ukrainës.

Ndërkohë, SHBA-ja i dorëzoi Ukrainës raketa me rreze të gjatë veprimi në fillim të këtij viti, por nuk u dha asnjë miratim për përdorim kundër objektivave thellë brenda territorit rus. sa/

Foto: EPA