Berlin, 17 maj 2024 (MIA) - Ministrat e Punëve të Jashtme të 13 vendeve kanë paralajmëruar në një letër se Izraeli nuk duhet të nisë një ofensivë të madhe ushtarake në qytetin Rafah në Rripin e Gazës dhe po ashtu kërkojnë më shumë ndihmë për popullatën palestineze, publikoi sot gazeta gjermane “Zidojçe cajtung”.

Letra me katër faqe, e datës 15 maj, drejtuar ministrit të Punëve të Jashtme të Izraelit, u nënshkrua nga të gjitha vendet e G7, përveç SHBA-së. Në të, ministrat theksuan të drejtën e Izraelit për vetëmbrojtje dhe dënuan sulmet terroriste nga Hamasi dhe grupet e tjera islamike më 7 tetor të vitit të kaluar.

Në letrën i bëhet thirrje qeverisë së kryeministrit Benjamin Netanjahu që të bëjë gjithçka që është në fuqinë e saj për të zbutur krizën shkatërruese dhe të thelluar humanitare në Rripin e Gazës.

"Zidojçe cajtung" thekson gjithashtu se krerët e diplomacisë kërkojnë që Izraeli të hapë të gjitha vendkalimet kufitare drejt enklavës palestineze për dërgimin e ndihmave, përfshirë këtu edhe vendkalimin Rafak në kufirin me Egjiptin.

Letra u nënshkrua nga ministrat e Punëve të Jashtme të vendeve nga G-7, Gjermania, Franca, Britania e Madhe, Italia, Japonia dhe Kanada, si dhe homologët e tyre nga Australia, Danimarka, Findanda, Holanda, Zelanda e Re, Koreja e Jugut dhe Suedia. ls/

Foto: EPA