Uashington, 28 shkurt 2025 (MIA) - Presidenti amerikan, Donald Tramp i tha shefit të shtetit ukrainas, Volodimir Zelenski i cili udhëtoi për në Uashington, se Ukraina ka probleme të mëdha dhe nuk do të fitojë në konfliktin me Rusinë.

Ai tha gjithashtu se është koha që konflikti të përfundojë, ndërsa Rusia është e gatshme për këtë. Ai poashtu theksoi se udhëheqësia ukrainase duhet të jetë e gatshme për kompromis.

"Kemi pasur negociata me rusët, kam folur edhe me presidentin Vlladimir Putin. Atë që doni ju, do edhe ai. Duhet të arrijmë marrëveshje. Është gjithmonë e nevojshme të bëhen kompromise. Është e pamundur të arrihet marrëveshje pa kompromis. Pra, ai do të duhet të bëjë kompromis", i tha Trampi Zelenskit në fillim të takimit në Shtëpinë e Bardhë.

Trampi theksoi se SHBA dhe Rusia kanë filluar negociatat për një zgjidhje të mundshme të konfliktit ukrainas dhe pasi të arrihet kjo marrëveshje, vlerësoi ai, "Moska nuk do të ketë më arsye për të rinovuar armiqësitë".

Duke komentuar fjalët e Zelenskit se ai ende nuk është gati për t'i dhënë fund konfliktit të armatosur, Trampi i kujtoi atij se Ukraina mbetet pa trupa. Siç tha ai, shefi i regjimit në Kiev po luan me jetët e miliona njerëzve dhe rrezikon të nisë Luftën e tretë botërore.

Lideri amerikan theksoi se çështja kryesore mbetet ndërprerja e armiqësive dhe ndarja e burimeve financiare për rindërtim. "Mijëra ushtarë po vdesin nga të dyja anët. Ne duam që kjo të ndalet dhe paratë të shkojnë për rikonstruim", tha ai.

Lideri amerikan shprehu shpresën se SHBA nuk do të duhet të dorëzojë shumë më tepër armë në Ukrainë, por se dërgesa do të vazhdojë me siguri në të ardhmen.

"Unë jam mes Rusisë dhe Ukrainës. Nuk jam me asnjërën palë”, tha Tramp, duke theksuar se qëllimi i tij ishte të zgjidhë konfliktin dhe shprehu shpresën se do të mbahet mend si një “paqebërës”.

Gjatë takimit, zëvendëspresidenti amerikan, Xhej- Di Vens akuzoi Zelenskin se po "i grind mediat amerikane" dhe shtoi se komentet e tij janë plot mungesë respekti, duke e pyetur: "A ke thënë një herë faleminderit?"

Zelenski udhëtoi për në Uashington për të nënshkruar marrëveshje për bashkëpunim midis Ukrainës dhe SHBA-së për mineralet. Siç paralajmëroi më herët ministri i Financave të SHBA-së, Skot Besant, dokumenti tashmë është dakorduar, ndërsa Zelenskit dhe Trampit i mbetet ta nënshkruajnë sot.

Foto: EPA