Uashington, 29 janar 2024 (MIA) - Sekretari amerikan i Mbrojtjes, Llojd Ostin, ka biseduar sot me shefin e NATO-s, Jens Stoltenberg, i cili po viziton Uashingtonin për të lobuar për vazhdimin e financimit të luftës së Ukrainës kundër trupave ruse.

Dhjetëra miliarda dollarë ndihmë amerikane janë dërguar në Ukrainë që nga pushtimi gati dy vjet më parë - por shumë ligjvënës republikanë hezitojnë të vazhdojnë të mbështesin Kievin.

Stoltenberg dhe Ostin - i cili ka udhëhequr shtytjen për mbështetje ushtarake ndërkombëtare për Kievin - u takuan në Pentagon me oficerin më të lartë ushtarak amerikan, gjeneralin Çarls Braunn dhe zyrtarë të tjerë.

Presidenti amerikan Xho Bajden i ka kërkuar Kongresit të miratojë 61 miliardë dollarë ndihmë të re për Ukrainën. Por bisedimet u ndërprenë pasi deputetët republikanë të zemëruar për fluksin rekord të emigrantëve përtej kufirit SHBA-Meksikë kërkuan ndryshime gjithëpërfshirëse në politikën e imigracionit dhe kontrollit të kufirit në këmbim të më shumë parave për Ukrainën.

Stoltenberg tha dje për Foks njuz se marrëveshja që po negociohet në Kongresin amerikan është një "marrëveshje e mirë".

"Ndihma amerikane për Ukrainën ishte vetëm një pjesë e buxhetit të Pentagonit, dhe megjithatë "ne ishim në gjendje të shkatërronim dhe degradonim në thelb ushtrinë ruse", tha Stoltenberg, duke shtuar: "Dhe kjo është arsyeja pse ne duhet të vazhdojmë ta bëjmë këtë". mb/

Foto: EPA