Romë, 7 qershor 2024 (MIA) - Italia nuk e përkrah propozimin e presidentit francez, Emanuel Makron të dërgojë instruktorë ushtarakë në Ukrainë dhe është kundër çdo forme të përshkallëzimi në luftën ruso-ukrainase, deklaroi sot zëvendëskryeministri dhe ministri i Punëve të Jashtme, Antonio Tajani.

"Putini bën propagandë parazgjedhore. Ne jemi për respektimin e pavarësisë së Ukrainës, por nuk do të dërgojmë trupa në Ukrainë dhe nuk do të dërgojmë armë në territorin rus", tha Tajani.

Pozicioni i Makronit, siç tha, nuk është njejtë me atë të Italisë.

"Nuk po ndjekim askënd: duhet të shmanget përshkallëzimi. Ne nuk jemi në luftë me Rusinë. Aktualisht ka një fushatë zgjedhore dhe Putini po tentojë ta ndajë Evropën, e cila është e bashkuar për këtë çështje", përfundoi zëvendëskryeministri. rq/bsh/

Foto: Arkivi i MIA-s