Uashington, 9 mars 2023 (MIA) - Shtëpia e Bardhë i dënoi sulmet e sotme ajrore ruse në Ukrainë, duke i quajtur brutale dhe të paarsyeshme. Së paku nëntë persona e humbën jetën në serinë e sulmeve me raketa dhe fluturake pa pilot.

"Është shqetësuese t'i shohim këto sulme brutale, të paarsyeshme ndaj infrastrukturës civile në tërë Ukrainën", deklaroi për gazetarët zëdhënësja e presidentit amerikan, Olivia Dalton.

Si rezultat i sulmeve, një pjesë e Ukrainës mbeti pa rrymë. përkohësisht ishte ndërprerë edhe furnizimi me energji elektrike në centralin Zaporozhje - centrali më i madh bërthamor në Evropë. ab/