Athinë, 26 mars 2024 (MIA) - Me iniciativën e partisë opozitare greke PASOK dhe presidentit Nikos Andrulakis, gjatë ditës pritet të paraqitet në Kuvend një propozim për votëbesimin ndaj Qeverisë së Demokracisë së Re, propozim që do të mbështetet edhe nga parti të tjera opozitare, njoftoi korrespondenti i MIA-s nga Athina.

Mocioni i mosbesimit ndaj Qeverisë vjen pas shkrimit të gazetës "To Vima" sipas të cilit bisedat mes drejtuesve të stacioneve hekurudhore ditën e aksidentit hekurudhor në Tempi më 28 shkurt 2023, të publikuar në media në atë kohë, u redaktuan për të forcuar me siguri pretendimin se shkaku i përplasjes mes dy trenave është gabimi njerëzor.

Për të paraqitur propozimin për mosbesimin e Qeverisë nevojiten së paku 50 nënshkrime, pra një e gjashta e numrit të përgjithshëm të deputetëve në Kuvend.

PASOK ka 32 deputetë, gjë që kërkon mbështetjen e partive të tjera opozitare dhe sipas njoftimeve pritet që SYRIZA, E Majta e Re dhe Kurs në liri të mbështesin nismën, e cila do të mbledhë mbi 85 nënshkrime.

Propozimi pritet të dorëzohet në Kuvend gjatë ditës dhe seanca plenare do të duhet të fillojë brenda 48 orëve, ndërsa diskutimi do të zgjasë tre ditë, pas së cilës do të vijojë edhe votimi.

Pasi kreu i PASOK-ut shpalli nismën për paraqitjen e propozimit për mosbesimin e Qeverisë, zëdhënësi i qeverisë Pavlos Marinakis komentoi se është e mirëseardhur.

Për të votuar mosbesimin e Qeverisë, propozimi duhet të mbështetet nga 151 prej gjithsej 300 deputetëve në Kuvend, ndërsa Demokracia e Re në pushtet ka shumicën prej 158 vende deputetësh. sa/