Uashington, 26 korrik 2023 (MIA) - Shefi i CIA-s, Uilliam Barns dhe shefi i inteligjencës britanike, Riçard Mur, u shkëputën nga fshehtësia e zakonshme gjatë punës së shërbimeve të tyre, për të bërë të qartë se për vlerat dhe interesat e demokracisë liberale në Perëndim, tani , në botën e ndryshuar, është thelbësore të luftohet kundër përpjekjes së Rusisë për të dominuar të paktën një pjesë të Ukrainës dhe për t'u përballur me kërcënimin kryesor - Kinën.

Kina është në rritje ekonomike, teknologjike dhe ushtarake dhe dëshiron të riorganizojë rendin botëror në mënyrën e vet, thonë Barns dhe Mur në një intervistë për portalin e Brukselit "Politiko".

Në prezantimin e tij para elitës diplomatike dhe të inteligjencës të Institutit Diçli të Britanisë, Barns theksoi rëndësinë e madhe të bashkëpunimit të ngushtë midis CIA-s dhe MI6 dhe theksoi se "epoka e pas Luftës së Ftohtë ka përfunduar plotësisht" dhe tha se ata, së bashku me aleatët e tyre dhe partnerët, tani duhej të garantonin "një botë që do të jetë e lirë, e hapur, e sigurt dhe një botë përmirësimi".

“Suksesi në këtë varet nga mënyra se si do të përballemi me tre sfida, e para është rivaliteti strategjik me një Kinë ambicioze dhe në rritje, si dhe me Rusinë, e cila vazhdimisht na kujton se fuqitë në rënie mund të jenë po aq shkatërruese sa ato në rritje”, prezantoi shefi i CIA-s.

"Sfida e dytë," thotë Barns, "janë fatkeqësitë pa pasaporta, të tilla si krizat klimatike dhe pandemitë globale, të cilat janë përtej mundësive të çdo vendi dhe po bëhen gjithnjë e më akute dhe jetike për jetën dhe mbijetesën."

Një pikëpamje të ngjashme për situatën dhe problemet në botë dha edhe Mur, ndërsa të dy paralajmërojnë se sfida e tretë e madhe për botën është gjithashtu "revolucioni teknologjik që ndryshon mënyrën tonë të jetesës, punës, luftës dhe konkurrencës" dhe tregojnë dyshime dhe ankthe të mëdha rreth aplikimit të pakontrolluar të inteligjencës artificiale.

Shefi i MI6 dhe kreu i CIA-s pajtohen se "sfida më e menjëhershme dhe e ashpër gjeopolitike ndaj rendit ndërkombëtar është pushtimi i Ukrainës nga Vladimir Putin".

Mur lejon gjithashtu mundësinë e negociatave të paqes, ndaj thotë se "askush nuk dëshiron të poshtërojë Putinin dhe popullin e madh rus, shumica e konflikteve përfundojnë me negociata, por këtë duhet ta vendosë Ukraina, jo ne".

Barns, i cili ishte gjithashtu ambasador i SHBA-së në Moskë, thekson se ai "kaloi më shumë se dy dekada duke u përpjekur të kuptonte dhe të përballej me përzierjen e djegshme të ndjenjave të padrejtësisë, ambicies dhe pasigurisë që Putini mbarti brenda vetes".

Shefi i CIA-s nënvizon se “ukrainasit kanë treguar se nuk do të tërhiqen, ashtu si të gjithë ne që mbështesim Ukrainën”.

Përfundimi i Barns është se "lufta e Putinit tashmë është kthyer në një dështim strategjik për Rusinë, dobësia e saj ushtarake është ekspozuar, ekonomia e saj është shembur për shumë vite, e ardhmja e saj është të jetë partneri i vogël dhe koloni ekonomike e Kinës... NATO është bërë akoma më të fortë”.

Drejtuesit e shërbimeve të inteligjencës amerikane dhe britanike pajtohen se për Perëndimin Kina është një sfidë shumë më e madhe se Rusia, "e cila është i vetmi vend që dëshiron të riformësojë rendin ndërkombëtar duke rritur njëkohësisht fuqinë e saj ekonomike, diplomatike, ushtarake dhe teknologjike".

Transformimi i Kinës gjatë pesë dekadave të fundit ka qenë i admirueshëm, thonë Barns dhe Mur, por ata besojnë se fuqia e madhe që Presidenti Si Xhinping ka fituar "në vend që të përdoret për të forcuar rendin ndërkombëtar që bëri të mundur transformimin e Kinës, tani synon riformësimin atë."

Barns konkludon gjithashtu se "është e pamundur të injorohet fakti që në këtë epokë të re rivaliteti ynë po rritet në bazë të ndërvarësisë ekonomike dhe lidhjeve tregtare".

Shefi i CIA-s beson se ajo ka çuar gjithashtu në "varësi strategjike, dobësi kritike dhe kërcënime serioze për sigurinë dhe përparimin tonë, por do të ishte çmenduri të ndërpriteshin lidhjet me një ekonomi si Kina, por ne duhet të reduktojmë ndjeshëm rreziqet, të sigurojmë zinxhirë furnizimi, mbrojtje të zhvillimit tonë teknologjik dhe investime në kapacitete industriale”. ls/

Foto: Arkivi i MIA-s