Manilë, 26 korrik 2023 (MIA) - Tajfuni Doksuri sot i goditi pjesët veriore të Filipineve me erë të fuqishme dhe reshje të rrëmbyeshme, me ç'rast jetën e humbën së paku gjashtë persona, ndërsa mijëra të tjerë janë zhvendosur.

Tajfuni shkuli çati të shtëpive, vërshoi fshatra dhe shkaktoi dhjetëra rrëshqitje të dheut, kumtuan autoritetet lokale.

Tajfuni e goditi ishullin Fuga, ndërsa më vonë edhe një ishull tjetër në provincën Kagajan, ku pothuajse 16.000 njerëz u evakuuan nga fshatrat bregdetare, ndërsa shkollat dhe gjithçka tjetër janë mbyllur si masë kujdesi për shkak të motit të lig.

Dhjetëra mijë njerëz u goditën nga vërshimet dhe probleme të tjera të shkaktuara nga tajfuni.

Së paku katër qytete mbetën pa rrymë, ndërsa gjashtë ura u rrëzuan, kumtuan autoritetet në Kagajan në raportin për dëmet.

Roja bregdetare përdori barka gome dhe litarë për t'i evakuuar fshatarët e robëruar në shtëpitë e tyre nga vërshimi në qytetin Bakara në Ilokos Norte.

Filipinet çdo vit goditen mesatarisht nga 20 stuhi të mëdha, me qindra viktima.

Pas Filipineve, tajfuni do të vazhdojë drejt Tajvanit dhe Kinës lindore.

Shkencëtarët paralajmëruan se këto stuhi, të cilat e shkatërrojnë edhe infrastrukturën kritike, bëhen më të fuqishme për shkak të ndryshimeve klimatike. ab/

Foto: МIА arkivi