Londër, 6 janar 2025 (MIA) - Reshjet e dendura të borës dhe shirat e ngrirë kanë shkaktuar probleme serioze me transportin në shumë pjesë të Evropës, veçanërisht në Britani të Madhe dhe Gjermani.

Në pjesët veriore të Anglisë, në një lartësi mbidetare mbi 300 metra, është regjistruar borë deri në 40 centimetra. Ekziston frika se disa vendbanime mund të mbeten të shkëputura nga pjesa tjetër e botës.

Energjia elektrike është ndërprerë në disa pjesë të Birmingem, Bristol dhe kryeqytetit të Uellsit, Kardif.

Aeroportet në Liverpull, Mançester dhe Lids u mbyllën gjatë natës midis së shtunës dhe të dielës, por trafiku gradualisht u rinovua. Disa ndeshje sportive u anuluan, por derbi i madh i futbollit anglez mes Liverpull dhe Mançester megjithatë u luajt dhe u mbyll në barazim, 2:2.

Trafiku në Mbretërinë e Bashkuar ishte i mbingarkuar dje pasi shumë u kthyen në shtëpi pas festave të Krishtlindjeve dhe Vitit të Ri. Disa nga linjat hekurudhore u mbyllën përkohësisht.

Në Gjermani, bora dhe akulli gjithashtu shkaktuan kaos. Në aeroportin e Frankfurtit janë anuluar 120 nga 1090 fluturimet e planifikuara, ndërsa në aeroportin e Mynihut është hapur vetëm një pistë.

Në shtetin jugor Baden-Virtemberg, tetë persona u plagosën pasi një autobus doli nga rruga. ls/

Foto: DPA