Venecia, 25 prill 2024 (MIA) - Në Venecia sot ka ardhur deri në përleshje mes policisë dhe protestuesve, që janë kundër vendosjes së taksës turistike për hyrje në qytetin italian, njofton BBC.

Disa nga protestuesit tentuan të çajnë kordonin e policisë në zonën e Piacale Roma dhe të hyjnë në pjesën historike të Venecias. Të tjerë mbanin pankarta ku shkruhej "Venecia nuk është në shitje, është e mbrojtur" dhe "Jo taksave, Po shtëpive dhe shërbimeve për të gjithë".

Venecia është bërë qyteti i parë në botë që ka vendosur taksë turistike. Nga sot ata paguajnë tarifë prej 5 euro për të vizituar qytetin nga ora 08:30 deri në 16:00. Taksa nuk zbatohet për banorët e rajonit Veneto, për njerëzit që punojnë, studiojnë ose kanë lindur në Venecia, si dhe për turistët që kanë rezervuar qëndrimet e natës në qytet. Fëmijët deri në 14 vjeç nuk paguajnë taksë turistike.

Turistët me rezervime gjatë natës në Venecia do të duhet t'u tregojnë zyrtarëve të biletave një kod të veçantë QR në smartfonat e tyre. Për ata që nuk kanë telefona inteligjentë, ka stenda të posaçme me përfaqësues të autoriteteve komunale, të cilëve mund t'u dëshmojnë se kanë të drejtë për akses falas në qytet.

Turistët që nuk paguajnë tarifën mund të gjobiten nga 50 deri në 300 euro.

Hyrja fillimisht do të tarifohet në bazë prove deri më 5 maj dhe më pas në shumicën e fundjavave deri në mes të korrikut. Deri në fund të vitit do të vendoset nëse masa e re do të bëhet e përhershme.

Nisma është një përpjekje për të dekurajuar turistët që vizitojnë qytetin vetëm për një ditë në kohë piku.

Sipas vlerësimeve, rreth 15 milionë njerëz e kanë vizituar qytetin vitin e kaluar. mb/

Foto: EPA