Lusaka, 31 mars 2024 (MIA) – Për shkak të kushteve ekstreme të motit, mbi 20 milionë njerëz po përballen me urinë në Afrikën Jugore, ku thatësira ka arritur nivele kritike.

Zambia dhe Malavi e kanë shpallur thatësirën një katastrofë kombëtare, ndërsa Zimbabveja fqinje, ku rreth 2.7 milionë njerëz po përballen me urinë, është afër marrjes së një vendimi të tillë.

Thatësira preku një zonë të gjerë nga Bocvana dhe Angola në perëndim deri në Mozambik dhe Madagaskarin në lindje të Afrikës jugore.

Thatësira në ato vende ka shkatërruar të mbjellat në të cilat mbështeten dhjetëra miliona njerëz për të mbijetuar.

Presidenti i Zambisë Hakainde Hiçilema tha se janë shkatërruar një milion hektarë nga 2.2 milionë të mbjellat kryesore të misrit në vendin e tij. Presidenti i Malavisë, Lazarus Çakvera, ka kërkuar 200 milionë dollarë ndihmë humanitare.

Me një korrje jashtëzakonisht të dobët këtë vit, miliona njerëz në Zimbabve, Malavi jugor, Mozambik dhe Madagaskar nuk do të mund të ushqehen deri vitin e ardhshëm. USAID vlerëson se 20 milionë njerëz do të kenë nevojë për ndihmë ushqimore në Afrikën Jugore në muajt e parë të vitit 2024.

Shumë njerëz nuk do të marrin ndihmë, pasi agjencitë e ndihmës kanë burime të kufizuara në mes të një krize globale urie dhe parave gjithnjë e më pak.

Një vit më parë, pjesa më e madhe e këtij rajoni u godit nga stuhi të mëdha tropikale dhe përmbytje të mëdha. I gjithë rajoni është në një lloj rrethi vicioz: fillimisht shumë shi, pastaj jo mjaftueshëm.

Fondi i Kombeve të Bashkuara për Fëmijët (UNICEF) thotë se ka "kriza të mbivendosura" të motit ekstrem në Afrikën lindore dhe jugore, me dy rajonet në vitin e kaluar që ishin midis "dy zjarreve" - ​​stuhive dhe përmbytjeve, të ndjekura nga nxehtësia dhe thatësira.

UNICEF vlerëson se rreth nëntë milionë njerëz, gjysma e të cilëve janë fëmijë, kanë nevojë për ndihmë në Malavi, gati gjysma e popullsisë, ndërsa numri në Zambia është më shumë se gjashtë milionë, tre milionë prej të cilëve janë fëmijë.

Përveç ndryshimeve klimatike të shkaktuara nga njeriu, rajoni është gjithashtu nën sulm nga fenomeni klimatik El Ninjo, i cili ngroh pjesë të Oqeanit Paqësor çdo dy deri në shtatë vjet, dhe në Afrikën jugore kjo do të thotë reshje dhe thatësirë ​​nën mesataren. sa/

Foto: Arkivi i MIA-s