Manila, 11 qershor 2023 (MIA) - Mijëra njerëz që jetojnë në afërsi të vullkanit Majon në Filipinet qendrore janë evakuuar për të shmangur kërcënimin e sotëm të hirit, shkëmbinjve djegës dhe gazeve helmuese që rrjedhin nga krateri, njoftuan zyrtarët lokalë.

Sizmologët kanë raportuar se një tërmet vullkanik ka ndodhur në 24 orët e fundit dhe se gurët e djegur po bien në një rreze prej dy kilometrash rreth vullkanit.

Rreth 13,000 njerëz, kryesisht nga fshatrat rrëzë vullkanit ose pranë tij, janë evakuuar, njoftoi zyra kombëtare e mbrojtjes civile.

"Është rrezik për shëndetin të jesh afër shpërthimit për shkak të dioksidit të squfurit ose për shkak të hirit", tha ministri i Shëndetësisë Teodoro Erbosa.

Presidenti i Filipineve Ferdinand Markos u kërkoi dje banorëve të provincës Albaj, ku ndodhet vullkani, të marrin udhëzime evakuimi nga autoritetet lokale.

Vullkani Majon, i vendosur 330 kilometra në juglindje të kryeqytetit Manila, konsiderohet si një nga më të paqëndrueshmet nga 24 vullkanet aktive të vendit, i cili ndodhet në "rripin e zjarrit" të Paqësorit.

Pesë vjet më parë, ai vullkan shpërtheu, duke nxjerrë miliona tonë hi, gurë dhe lavë dhe duke detyruar evakuimin e dhjetëra mijë njerëzve. sa/

Foto: EPA