Athinë, 28 shkurt 2024 (MIA) - Pak para mesnatës së 28 shkurtit 2023 në qarqet gazetareske në Greqi filluan të përhapen informacione se ka një problem me një tren në afërsi të Larisës, fillimisht se ndoshta ka dalë nga shinat, por pa u ditur saktë nëse bëhet fjalë për tren me pasagjere apo tren mallrash dhe çfarë ka ndodhur saktësisht, raporton korrespondenti i MIA-s nga Athina.

Informacioni i parë jozyrtar për një përplasje të drejtpërdrejtë mes dy trenave në afërsi të Tempit, i pasuar nga dhjetëra autoambulanca që i drejtoheshin vendit nga qytetet e afërta dhe konfirmimi se bëhej fjalë për një aksident të rëndë erdhi indirekt nga zyra e kryeministrit grek, nga ku gazetarët u informuan se Kirjakos Micotakis po anulonte vizitën në Selanik të planifikuar për të nesërmen.

 Nata ishte e gjatë, përmasat e aksidentit nisën të zbardheshin dalëngadalë, u njoftuan të dhënat e para zyrtare, dhjetëra të vdekur e po aq të lënduar.

Ekipet e shpëtimit ishin në terren gjatë gjithë natës, aksioni i tyre zgjati për ditë të tëra dhe Greqia përjetoi një nga aksidentet më të mëdha hekurudhore në 50 vitet e fundit.

 

Dy trena, njëri tren mallrash dhe tjetri tren pasagjerësh, me rreth 350 pasagjerë, për rreth dhjetë minuta, lëviznin me shpejtësi të madhe në të njëjtën linjë, por jo njëri pas tjetrit, por drejt njëri-tjetrit, njëri nga Athina në Selanik, tjetri nga Selaniku në Athinë, me pasojë përplasja direkte, që ka qenë e pashmangshme dhe nga e cila humbën jetën 57 persona, ndërsa dhjetëra janë lënduar.

57 persona vdiqën, 56 trupa u gjetën dhe u identifikuan, një trup, edhe pas një viti akoma nuk është gjetur.

Shumica e pasagjerëve në tren ishin studentë, të cilët ishin në një fundjavë të zgjatur dhe po ktheheshin ose në shtëpi ose në kampusin universitar.

Ndër tre vagonët e parë,të cilët ishin nga më të dëmtuarit, ishte edhe vagoni i restorantit, i cili nga forca e përplasjes është përmbysur mbi dy vagona të tjerë dhe ka marrë flakë, gjë që e ka vështirësuar edhe më shumë identifikimin e viktimave.

“Duhet theksuar se në vagonin konkret ka rënë zjarr dhe janë arritur temperatura shumë të larta që kanë arritur deri në 1300 gradë Celsius, fakt që e vështirëson identifikimin e personave që ndodheshin brenda”, tha më pas zëdhënësi i Shërbimit Zjarrfikës të Greqisë, Vasilios Vatrakoianis.

Nga 57 të vdekurit, 25 ndodheshin në këtë vagon, në vagonin e restorantit.

 

 

Ata nga vagonët e fundit mbetën të lënduar lehtë, ndërsa në tre të parët, situata me të cilën u përballën ekipet e shpëtimit ishte e frikshme.

Menjëherë pas aksidentit u shpallën 3 ditë zie, kryeministri grek dhe krerët e partive opozitare vizituan vendin e tragjedisë, ndërsa qytetarët u mblodhën në Athinë për të nderuar të vdekurit, por edhe për të kërkuar përgjegjësi.

“Shkruaj kur të arrish”, ishte slogani kryesor me të cilin u zhvilluan një sërë protestash masive në Athinë dhe qytete të tjera greke.

Protesta paqësore para Kuvendit të Greqisë në mes të dhjetorit kanë mbajtur edhe familjarët dhe të afërmit e viktimave, të cilët kërkuan drejtësi, përgjigje dhe mos mbulim të krimit.

 

Një vit pas tragjedisë, familjet janë ende në pritje të përgjigjeve.

Pas të hënës, ata mbajtën një konferencë për shtyp në prag të përvjetorit të aksidentit, treguan edhe një herë fatet e tyre tragjike dhe kërkuan sërish drejtësi.

“Kam humbur djalin tim 22-vjeçar në aksidentin e trenit. Ai dhe shoku i tij po ktheheshin nga Athina, për fat të keq, pesë minuta para përplasjes, ai u ngrit nga vendi në vagonin numër tre dhe shkoi në vagonin e restorantit për të blerë ujë. Ky vendim i tij ishte fatal. Shishen e ujit e pagoi me jetë”, tha Despina Ganidou, nëna e studentit që humbi jetën në aksident.

Andonis Psaropoulos, i cili humbi vajzën e tij dhe duke folur me lot në sy, tha se edhe pse i është dashur të përballet me pikëllimin, dhimbjen, dëshpërimin, por edhe mllefin, ka arritur të mbledhë forca dhe të luftojë për drejtësi bashkë me familjet e tjera të viktimave.

Ai theksoi se si jurist me profesion beson se që në momentin e parë aksidenti është dashur të trajtohet si çështje penale.

Të njëjtin mendim ndan edhe babai i 18-vjeçares Anastasia, i cili thotë se “një grup vrasësish të politikanëve, biznesmenëve, drejtuesve dhe punonjësve të korruptuar” janë fajtorë për aksidentin.

“Kjo është Anastasia, vajza ime, 18 vjeç e gjysmë, viti i parë në universitet. Ajo ishte në tren sepse të nesërmen, në orën 9 të mëngjesit, kishte një leksion në Universitetin e Selanikut”, tha babai i vajzës së re, duke u treguar të pranishmëve një foto të saj.

  Sipas autoriteteve, shkaku kryesor i aksidentit është gabimi njerëzor i përgjegjësit të stacionit hekurudhor në Larisa, nga ku treni, pasi bëri ndalesën e planifikuar, vazhdoi për në destinacionin përfundimtar - Selanik. si mungesa e një sistemi digjital për kontrollin dhe monitorimin e trenave.

Për aksidentin u arrestua dhe më pas u ndalua shefi i stacionit hekurudhor në Larisa, në Kuvend u krijua një komision i posaçëm hetimor, i cili ende po zhvillon seancat dhe familjarët e viktimave angazhuan një ekip ekspertësh të pavarur për të hetuar aksidentin, të cilët përgatitën raportin e tyre.

Hetimi, siç shpjeguan në konferencën për shtyp të hënën, ka ndjekur modelin e rrëzimeve të avionëve dhe treguan se detyra e tyre nuk ishte të hetonin se kush ishte fajtori, por të zbulonin saktësisht se çfarë ndodhi 

 

Ndër të tjera, ekspertët në vendin e aksidentit gjetën substancat ortoksilolli, tolueni dhe benzeni, të cilat mund të shkaktojnë ndezje edhe me një shkëndijë të vogël.

Në të njëjtën kohë, sipas inxhinierit mekanik dhe aeronautik dhe ekspertit special të aksidenteve Kostas Lakafosis, i cili është anëtar i ekipit të pavarur të ekspertëve, nëse nuk do të kishte pasur zjarr dhe shpërthim pas përplasjes së dy trenave, numri i viktimave do të kishte ka qenë më i ulët duke qenë se, siç tha ai, të paktën pesë nga 57 të vdekurit, kanë humbur jetën si pasojë e zjarrit. 

Më tej ai theksoi se një vit më vonë, hekurudhat në Greqi janë ende të pasigurta dhe janë shumë afër asaj që ishin vitin e kaluar kur ndodhi aksidenti.

Të paktën 85 persona u lënduan, disa morën lëndime të lehta, disa më të rënda, të gjithë po shërohen dhe një është ende në koma.

Ndërsa të mbijetuarit përpiqen të kapërcejnë makthet, familjet e viktimave kërkojnë drejtësi

Nëpërmjet një peticioni online ata po mbledhin nënshkrime për të bërë ndryshime kushtetuese dhe për të aktivizuar ligjin e llogaridhënies së ministrive dhe për të hequr imunitetin parlamentar për ata që janë të përfshirë "për t'u përgjigjur për krimin në Tempe".

Mbrëmjen e djeshme janë mbledhur mbi 820 mijë nënshkrime dhe kreu i SYRIZA-s, Stefanis Kaselakis, ka bërë të ditur dje përmes rrjeteve sociale se ka firmosur edhe ai peticionin.

 

Aksidenti i vitit të kaluar pranë Tempes ishte i treti në zonë në 25 vitet e fundit, me dy të mëparshmit që ndodhën në autostradë.

I pari në vitin 1999, kur një autobus me tifozë të klubit të futbollit PAOK u përplas me një kamion dhe humbën jetën shtatë persona dhe i dyti, në vitin 2003, kur një autobus me studentë u përplas me një kamion, ku humbën jetën 21 persona.

Për përvjetorin e aksidentit të trenit, në kujtim të viktimave, por edhe për problemet e përditshme të qytetarëve, sindikata e punonjësve të sektorit shtetëror ka caktuar një grevë 24 orëshe me sloganin “Nuk harrojmë” dhe një sërë protestash janë planifikuar si në Athinë ashtu edhe në qytete të tjera greke.

Në të njëjtën kohë, këmbanat e kishave në të gjithë Greqinë do të bien 57 herë në orën 10 të mëngjesit të sotëm, aq sa është edhe numri i viktimave të aksidentit.

 Sanja Ristovska