Prishtinë, 4 tetor 2023 (MIA) - Policia e Kosovës njoftoi se në Mal të Zi janë arrestuar dy shtetas të Kosovës, të cilët janë kërkuar me urdhër arrest ndërkombëtar, nën dyshimin se kanë kryer krime lufte në luftën e vitit 1998-99 në Kosovë, lajmëroi korrespondenti i MIA-s nga Prishtina.

Personi i identifikuar me inicialet Z.V. (i lindur në vitin 1961) është arrestuar më 1 tetor, ndërsa më 4 tetor u arrestua I.B. ( i lindir në vitin 1975).

"Pas koordinimit dhe shkëmbimit të informacioneve reciproke të Policisë së Kosovës me autoritetet kompetente të Malit të Zi, më datë 01.10.2023, autoritetet e Malit të Zi e kanë arrestuar në territorin e tyre personin e kërkuar me urdhër arrest ndërkombëtar me inicialet Z.V  shtetas i RKS-së, i kërkuar nga autoritetet e Kosovës për veprën penale "Krime Lufte". Po ashtu me datë 04.10.2023, autoritetet e Malit të Zi e kanë arrestuar në territorin e Malit të Zi personin e kërkuar me urdhër arrest ndërkombëtar me inicialet I.B  shtetas I RKS-së, i kërkuar nga autoritetet e Kosovës për veprën penale "Krime Lufte", thuhet në kumtesën e policisë.

Policia ka bërë të ditur se të arrestuarit i janë nënshtruar procesit të ekstradimit nga Mali i Zi në Kosovë, sipas procedurave ligjore.

"Policia e Kosovës përmes ILEKU-t, (Njësia ndërkombëtare për bashkëpunim për zbatim të ligjit) vazhdon në avancimin e bashkëpunimit ndërkombëtar me institucionet e zbatimit të ligjit të shteteve të tjera, dhe me organizatat ndërkombëtare policore e të sigurisë, me qëllim të arrestimit të personave të kërkuar me urdhër arrest ndërkombëtar, ekstradimit apo sjelljes së tyre para organeve të drejtësisë", thuhet në kumtesë. sa/