Tel Aviv, 11 qershor 2023 (MIA) - Disa mijëra izraelitë demonstruan mbrëmë në Tel Aviv dhe qytete të tjera për javën e 23-të me radhë, kundër planit të diskutueshëm për reformimin e sistemit të drejtësisë të qeverisë së kryeministrit Benjamin Netanjahu.

Mbledhja u zhvillua në qendër të Tel Avivit, si dhe në qytetet Haifa dhe Rehovot.

Një numër i madh protestuesish mbanin fletushka që kritikonin mosveprimin e qeverisë përballë valës së krimit që prek aktualisht pakicën arabe të Izraelit.

Sipas OJQ-ve të ndryshme arabe për të drejtat e njeriut, që nga fillimi i vitit, rreth 100 njerëz janë vrarë në dhunën e lidhur me krimin midis pakicës arabe të Izraelit.

Mbështetësit e reformave, të cilat do të dobësonin Gjykatën Supreme dhe do të kufizonin mbikëqyrjen gjyqësore të ligjeve dhe vendimeve të qeverisë, thonë se është e nevojshme t'u rikthehet pushteti zyrtarëve të zgjedhur.

Kundërshtarët paralajmërojnë se kjo do të minonte sistemin e ndjeshëm të kontrolleve dhe balancave të autoriteteve.

Presidenti izraelit Isak Hercog ka një muaj që po negocion me përfaqësuesit e qeverisë dhe opozitës për të arritur një kompromis për reformat. sa/

Foto: Arkivi i MIA