Athinë, 14 qershor 2024 (MIA) - Temperatura jashtëzakonisht të larta u regjistruan dje në disa pjesë të Greqisë, ndërsa në ishujt e Kretës dhe Rodosit, në Peloponez dhe në zonën e Atikës, rajoni më i gjerë i Athinës, termometri tregoi midis 43.3 dhe 44.5 gradë Celsius, sipas të dhënave të Observatorit Kombëtar dhe të portalit Meteo, njofton korrespondentja e MIA-s nga Athina.

Nga gjithsej 500 stacione meteorologjike aktive në të gjithë Greqinë, gjysma e tyre matën mbi 37 gradë, ndërsa 136 stacione mbi 40 gradë Celsius.

Temperatura maksimale më e lartë (44.5) është regjistruar në afërsi të Hanias në ishullin e Kretës, ndërsa temperatura mesatare maksimale në Greqi ishte 36.3 gradë.

Në zonën e Atikës, rajoni më i gjerë i Athinës, 55 nga 74 stacione aktive regjistruan temperatura mbi 40 gradë Celsius.

Prej të martës Greqinë e ka kapluar valë e të nxehtit me temperatura jashtëzakonisht të larta që kulminoi dje, ndërsa ministritë kompetente dolën me masa dhe rekomandime për qytetarët, të mërkurën dhe të enjten ku një pjesë e shkollave dhe kopshteve në vend janë mbyllur, ndërsa në të njëjtat ditë Akropoli në periudhën prej orës 12 deri në 17 ishte i mbyllur për vizitorët. rq/

Foto: arkivi i MIA-s