Bejrut, 6 nëntor 2024 (MIA) – Lideri i ri i sapoemëruar i Hezbollahut libanez, Naim Kasem deklaroi sot se nuk është e mundur që Izraeli të fitojë në luftën kundër organizatës proiraniane. 

“Fitorja është e jona dhe ne jemi gati për një luftë rrënimi pa marrë parasysh sa do të zgjasë. Izraeli nuk mund ta fitojë atë luftë. Ne do të qëndrojmë të vendosur dhe (kryeministri izraelit Benjamin) Netanjahu nuk mund të fitojë”, tha Kasem me rastin e 40 ditëve të vrasjes së paraardhësit të tij Hasan Nasralla në një sulm ajror izraelit në Bejrut.

Kasem tha se nuk ka vend në Izrael të pakapshëm për raketat e Hezbollahut. Ai vlerësoi se fushëbeteja është rruga e vetme për paqe. 

“Kemi dhjetëra mijëra luftëtarë të trajnuar të aftë të kundërshtojnë armikun. Do ta detyrojmë armikun të kërkojë fund të agresionit”, tha Kasem, transmetuan mediat palestineze. 

Duke e hedhur poshtë mundësinë për marrëveshje përmes bisedimeve, Kasem tha se lufta do të përfundojë vetëm në fushëbetejë, ndërsa jo përmes aksionit politik. 

Megjithatë, ai shtoi se nëse Izraeli ndalon me aksionet kundër Hezbollahut, atëherë do të hapet rruga për bisedime indirekte përmes shtetit libanez. fc/

Fotografia: EPA