Prishtinë, 5 qershor 2023 (MIA) - Kryeministri i Kosovës, Albin Kurti do t'i presë sot të dërguarin e posaçëm të Bashkimit Evropian për dialogun mes Kosovës dhe Serbisë, Mirosllav Lajçak dhe zëvendësndihmës sekretarin shtetëror të Shteteve të Bashkuara të Amerikës dhe të dërguarin e posaçëm të presidentit Xho Bajden për Ballkanin, Gabriel Eskobar, informon korrespondenti i MIA-s nga Prishtina. 

Sipas kumtesës së shërbimit për informim të Qeverisë, Kurti do të takohet me përfaqësuesit e BE-së dhe të SHBA-së në kabinetin e tij në orën 20. Për nesër paradite është paralajmëruar takim i dy diplomatëve edhe me presidenten e Kosovës, Vjosa Osmani. 

Qëllimi i vizitës së Lajçakut dhe Eskobarit është gjetja e zgjidhjes për situatën e tensionuar në Veri të Kosovës, ku serbët e atjeshëm më shumë se një javë protestojnë kundër zgjedhjes së kryetarëve shqiptarë në katër komunat e atjeshme në zgjedhjet e jashtëzakonshme lokale, të cilat popullata e atjeshme serbe i bojkotoi. 

Me qëllim të qetësimit të situatës në atë pjesë të Kosovës, e banuar me popullatë shumicë serbe, ndërmjetësuesi evropian dhe amerikan nesër do të udhëtojnë për në Beograd, ku, mes tjerash, pritet të takohen me presidentin e Serbisë, Aleksandar Vuçiq. fc/