Prishtinë, 1 gusht 2022 (MIA) – Kryeministri i Kosovës, Albin Kurti, sot deklaroi se nuk ka marrë ftesë nga Brukseli, transmeton Radio Evropa e Lirë. "Është dashur të takohem me presidentin e Serbisë në Bruksel më 19 korrik, por ai kërkoi që ai takim të shtyhet për në fund të gushtit. Ndoshta ka qenë i zënë me përgatitjen e asaj që ndodhi dje pasi është dashur të takoheshim më 19 korrik", tha Kurti sot në konferencë për shtyp. Kurti shtoi se e “ka shprehur gatishmërinë për të shkuar në Bruksel kur do t'i ftojë përfaqësuesi i lartë i BE-së", Zhozep Borrell. “Një ftesë të tillë nuk kemi ende, kur do ta marrim do ta shpallim dhe do ta prezantojmë qëndrimin tonë”, tha Kurti dhe shtoi se e mbështet dhe është i gatshëm për dialog i cili do të çojë deri në normalizim të plotë të marrëdhënies midis Kosovës dhe Serbisë, të fokusuar në njohjen reciproke. Presidenti i Serbisë, Aleksandar Vuçiq dhe kryeministri i Kosovës, Albin Kurti, kanë marrë ftesë nga shefi i diplomacisë evropiane, Josep Borrell, që të vijnë në Bruksel dhe të vazhdojnë dialogun për të gjitha çështjet e hapura, konfirmojnë burime në Bruksel për Radion Evropa e Lirë. fb/