Prishtinë, 20 dhjetor 2024 (MIA) - Zëvendësministri i Punëve të Jashtme dhe Diasporës së Kosovës, Kreshnik Ahmeti, kumtoi se Armenia i njohu pasaportat e Kosovës.

"Armenia ka njohur zyrtarisht pasaportat e Kosovës, duke përfshirë pasaportat e zakonshme, diplomatike dhe zyrtare. Ky është një hap i rëndësishëm për përforcimin e lidhjeve dhe marrëdhënieve midis qytetarëve dhe institucioneve të dy vendeve", ka shkruar Ahmeti në Fejsbuk.

Kryeministri i Kosovës Albin Kurti gjithashtu në Fejsbuk ka publikuar se pasaporta e Kosovës po bëhet më e fortë dhe e njohur ndërkombëtarisht.

"Pas liberalizimit të vizave dhe njohjes së pasaportave nga Spanja në janar, e mbyllim këtë vit me lajmin se Armenia, një vend që ende nuk na njeh, prej sot ka vendosur të njohë pasaportën e Republikës sonë", shtoi Kurti. rq/bsh/

Foto: arkivi i MIA-s