Bruksel, 22 gusht 2023 (MIA) - Nënkryetari i Komisionit Evropian, Frans Timermans do të japë dorëheqje nga funksioni i tij në Komisionin Evropian që të kandidohet në zgjedhjet kombëtare në Holandë në nëntor, duke e privuar BE-në nga një figurë kyçe në negociatat e ardhshme ndërkombëtare për klimën.

Partia Laburiste Holandeze dhe Partia e Majtë e Gjelbër sot njoftuan se Timermans do të jetë lideri i tyre në zgjedhjet e përgjithshme të 2 nëntorit. 

Timermansi, mandati i të cilit në Komisionin Evropian përfundon në nëntor të këtij viti, në korrik deklaroi se do të dëshirojë të përpiqet si kryeministri i ardhshëm holandez. 

 Komisioni bëri të ditur se Timermansi do të japë dorëheqjen nga funksioni në Komision pas paralajmërimit të Partisë Laburiste dhe Partisë së Majtë të Gjelbër. Timermansi, i cili përveç holandishtes së tij amtare,  flet anglisht, gjermanisht, frëngjisht, italisht dhe rusisht , është një figurë e njohur në Holandë, pasi ka kryer funksionin ministër i Punëve të Jashtme nga viti 2012 deri në vitin 2014.

Pas pothuajse një dekade në Bruksel, Timermansi do të garojë në zgjedhjet e para holandeze që nga viti 2006, në të cilat kryeministri në largim Mark Rute nuk do të drejtojë partinë e tij konservatore VVD. 

 Rute, kryeministri më jetëgjatë i Holandës, e tronditi kombin në korrik kur njoftoi se do të japë dorëheqjen pasi koalicioni i tij katërpartiak nuk arriti të dakordojë për politikën e emigrantëve.

Foto: Arkivi i MIA-s