Gjenevë, 11 janar 2024 (MIA) - Drejtoresha ekzekutive e Hjuman Rajts Uoç (HRV) Tirana Hasan deklaroi sot se bashkësia ndërkombëtare duhet të angazhohet që Izraeli të respektojë vendimin e Gjykatës ndërkombëtare të drejtësisë në Hagë dhe përgëzoi Afrikën e Jugut për inicimin e procedurës për kinse gjenocid në Rripin e Gazës.

“Nëse Izraeli nuk respekton masat apo aktgjykimin e gjykatës, atëherë bashkësisë ndërkombëtare i takon të bëjë presion për të inkurajuar Izraelin që të zbatojë realisht masat”, tha Hasan, transmetojnë mediat britanike.

Ajo shtoi se që nga fillimi i luftës midis Izraelit dhe Hamasit më 7 tetor ka pasur "shkelje flagrante të ligjit ndërkombëtar humanitar".

"Kemi arritur të dokumentojmë elementet e një krimi - krimit të urisë", ka thënë Hasan.

Sipas saj, autoritetet izraelite nuk kanë hequr dorë nga "mënyra e urisë" edhe pas kumtesës së HRV-së.

Afrika e Jugut sot në hapjen e seancës para Gjykatës ndërkombëtare të drejtësisë në Hagë lidhur me pretendimin e vendit kundër Izraelit për gjenocid në Rripin e Gazës, deklaroi se Izraeli po e nënshtron popullin palestinez në aparteid dhe gjenocid.

Afrika e Jugut pohon se Izraeli ka shkelur nenin 2 të Konventës së Kombeve të Bashkuara për gjenocid të vitit 1948 duke kryer akte që përkufizohen si gjenocid.

Izraeli nesër do të ketë mundësinë të dalë me përgjigje para gjykatës.