Gaza, 1 prill 2024 (MIA) - Lëvizja palestineze Hamasi për herë të parë i ka kërkuar falje popullatës në Gaza për vuajtjet e shkaktuara nga lufta, në një komunikatë të publikuar në kanalin e saj Telegram.

Lëvizja islamike palestineze kërkoi ndjesë për vështirësitë e shkaktuara nga lufta kundër armatës izraelite, e cila zgjat pothuajse gjashtë muaj. Hamasi me këtë rast e përsëriti qëllimin për vazhdimin e luftës, duke theksuar se ajo duhet të mundësojë arritje "fitore dhe liri" për palestinezët.

Hamasi dërgoi "mesazh për mirënjohje për njerëzit" nga Rripi i Gazës, "lodhjen" e së cilës e pranon.

Lëvizja ka këmbëngulur në masa që janë përpjekur t'i vendosin që t'i lehtësojë vështirësitë, sidomos përpjekjet që t'i "kontrollojë çmimet" në kuadër të mundësive të veta "duke pasur parasysh agresionin vijues".

Hamasi pohon se komunikon me "të gjitha komponentet" e shoqërisë në Gaza, duke përmendur lëvizje tjera të armatosura "komitete dhe grupe popullore" që "t'i zgjidh problemet e shkaktuara nga okupimi".

Nevojat humanitare janë të mëdha në atë territor, i cili tashmë ka qenë nën bllokadën izraelite të vendosur në vitin 2006 para luftës, ndërsa është i kapluar nga varfëria dhe papunësia.

Ndihmat po mbërrijnë dhe shumica e popullsisë është zhvendosur në pjesën më jugore, rreth Rafah, afër kufirit të mbyllur me Egjiptin. Ky qytet kishte më pak se 300.000 banorë para luftës dhe tani është shtëpia e më shumë se një milion njerëzve të zhvendosur, sipas vlerësimeve të OKB-së.

Muajt ​​e fundit, figura të ndryshme të Hamasit, si Kaled Mehal, ish-kreu i Byrosë politike të Hamasit, kanë gjykuar se "sakrificat" janë të nevojshme për "çlirimin" e palestinezëve.

Lufta u ndez nga një sulm i paprecedentë i Hamasit nga Rripi i Gazës më 7 tetor kundër Izraelit, i cili rezultoi në vdekjen e të paktën 1.160 njerëzve, kryesisht civilë. Sipas Izraelit, rreth 250 persona janë rrëmbyer gjithashtu, ndërsa 130 prej tyre mbeten peng në Gaza, nga të cilët 34 kanë humbur jetën.

Si hakmarrje, Izraeli u zotua të shkatërrojë Hamasin, të cilin e konsideron një organizatë terroriste si SHBA-ja dhe Bashkimi Evropian, dhe nisi një ofensivë që ka vrarë të paktën 32.782 njerëz në Rripin e Gazës. mb/

Foto: MIA