Kiev, 26 gusht 2024 (MIA) - Të paktën gjashtë persona kanë humbur jetën, ndërsa dhjetëra janë plagosur në sulmin e sotëm ajror rus, ku janë gjuajtur raketa dhe dronë në më shumë se gjysmën e rajoneve të Ukrainës.

Siç transmeton Bi-Bi-Si, është goditur infrastruktura energjetike, duke shkaktuar një ndërprerje të gjerë të energjisë pasi i gjithë vendi u vendos në alarm për sulmin ajror dhe popullata u urdhërua të vendstrehohej.

Rusia konfirmoi se ka filluar sulme ndaj infrastrukturës energjetike të Ukrainës - një nga taktikat e saja afatgjate - dhe tha se të gjitha caqet e saj ishin goditur. Sulmi me raketa dhe dronë filloi gjatë natës dhe vazhdoi deri në mëngjes.

Sipas Mikola Oleshçuk, komandant i Forcave ajrore të Ukrainës, Rusia ka lëshuar 127 raketa dhe 109 dronë. Nga këto, Ukraina ka rrëzuar 102 raketa dhe 99 dronë, tha ai në aplikacionin Telegram. Oleshçuk e përshkroi këtë si sulmin “më masiv ajror" ndonjëherë.

Mediat britanike theksojnë se me sulmet e sotme Rusia donte të “rikthej në tokë popullin e thjeshtë në Ukrainë”, duke iu kujtuar atyre dhe politikanëve perëndimor se Kremlini ka ende avantazh në këtë luftë. "Porosia nga Moska ishte: mos keni huti, Rusia ende mund t'i shkaktojë mjerim popullatës ukrainase kurdo që dëshiron", analizon Bi-Bi-Si.

Kryeministri ukrainas Denis Shmigal më herët deklaroi se sulmi përfshinte dronë, raketa kryqëzuese dhe raketa supersonike.

Një nga termocentralet tjera - ajo në veri të Kievit - ka qenë një nga objektivat e fundit. Dëmi është ende duke u vlerësuar.

Foto: EPA