Sofje, 10 qershor 2024 (MIA) - Partia e Qendrës së Djathtë të Bullgarisë GERB është në rugën e duhur për të fituar më së shumti vota në zgjedhjet parlamentare, por do t'i nevojiten partnerëve të koalicionit për të formuar qeveri, treguan sot rezultatet e parakohshme në bazë të 64,06 për qind të votave të numëruara.

Rezultatet e zgjedhjeve të së dielës, të gjashtat në Bullgari në tre vitet e fundit, tregojnë se GERB ka fituar 23,65 për qind të votave.

Lëvizja për drejtësi dhe liri, e cila përfaqëson më së shumti pakicën e madhe turke në vend, fitoi 15,89 për qind të votave, ndërsa blloku properëndimor Ndryshimet Vazhdojnë (NV) ka 15,08 për qind mbështetje.

Partia ultranacionaliste "Rindërtimi" fitoi 14.33 për qind.

Zgjedhjet, që u mbajtën dje, u shpallën pas rënies së koalicionit ndërmjet GERB-it dhe NV-së në mars.

Mediat britanike shkruajnë se Bullgarisë, anëtare e NATO-s, i nevojitet një qeveri stabile, funksonale për ta përshpejtuar rrjedhën e mjeteve evropiane në këtë vend me infrastrukturë të keqe dhe ta nxisë ta pranojë euron dhe të hyjë në zonën e Shengenit.

Udhëheqësi i GERB-it, Bojko Borisov, udhëhoqi Bullgarinë për më shumë se një dekadë përpara se të humbiste pushtetin në vitin 2021, pasi mijëra njerëz protestuan për mosveprimin e tij në luftën kundër korrupsionit dhe marrëdhëniet e tij të mira me oligarkët e fuqishëm vendas. sa/

foto: Arkivi i MIA-s