Bruksel, 25 nëntor 2024 (MIA) - Sipas vlerësimeve të hershme, shpenzimet e përgjithshme për mbrojtje sociale në Bashkimin Evropian arritën 4.583 miliardë euro gjatë vitit 2023, që është një rritje prej 6,1 për qind në krahasim me periudhën e njëjtë të vitit paraprak, njoftoi sot Eurostat.

Enti  i Statistikave të BE-së thekson se shpenzimet për mbrojtje sociale përfaqësojnë 26,8 për qind të produktit të përgjithshëm bruto (PBB) të Bashkimit Evropian, që paraqet një rënie prej 0,1 pikë përqindjeje krahasuar me vitin paraprak. Ndër vendet e BE-së për të cilat janë bërë vlerësimet për vitin 2023, shpenzimet për mbrojtje sociale si përqindje e PBB-së ishin më të lartat në Francë (31,3 për qind), Finlandë (31,2) dhe Austri (29,7),  Irlandë (12 për qind), Maltë (13,2) dhe Estoni (15,3).

 Përfitimet e pleqërisë dhe sëmundjes (mbrojtjes shëndetësore) përbënin pjesën më të madhe të përfitimeve të mbrojtjes sociale në të gjitha vendet e BE-së, ndërsa kategoritë e tjera përfshijnë invaliditet, familje (fëmijë), papunësi, strehim dhe përjashtim social.

 Shpenzimet për mbrojtjen sociale janë rritur gjatë vitit 2023 në të gjitha vendet e BE-së për të cilat janë publikuar vlerësimet. Rritja më e lartë u vu re në Sllovaki (për 18,9 për qind krahasuar me 2022), Poloni (18,4) dhe Hungari (15,2), dhe rritja më e ulët u vu re në Danimarkë (2,3), Itali (3,5 për qind) dhe Estoni (3,8).

Foto: Arkivi i MIA-s