Prishtinë, 28 maj 2024 (MIA) - Presidentja e Kosovës, Vjosa Osmani ka pritur sot në takim të dërguarin e posaçëm të Gjermanisë për Ballkanin Perëndimor, Manuel Sarazin, me të cilin  ka biseduar për zhvillimet e fundit politike dhe të sigurisë në vend dhe rajon, njoftoi korrespondenti i MIA-s nga Prishtina.

 Siç bëri të ditur kabineti presidencial, Osmani në takim me emisarin gjerman e ka theksuar përkushtimin e Kosovës në procesin e integrimit evropian, duke shprehur mirënjohjen për mbështetjen e Gjermanisë.

 Ajo ka shprehur edhe mbështetje të plotë për Procesin e Berlinit dhe marrëveshjet e dala nga ky proces, ndërsa  ka kërkuar edhe vazhdimin e mbështetjes nga Gjermania për anëtarësimin e Kosovës në Këshillin e Evropës dhe organizatave të tjera ndërkombëtare. 

"Presidentja Osmani e theksoi edhe nevojën për vazhdimin e mbështetjes gjermane për forcimin e pozitës ndërkombëtare të Kosovës, si dhe përmbushjen e aspiratave për anëtarësim në Këshillin e Evropës, NATO, BE dhe organizata të tjera ndërkombëtare", thuhet në komunikatën e takimit të Osmanit me Sarazinin.