Prishtinë, 27 nëntor 2023 (MIA)  -  Banka Qendrore e Kosovës ka njoftuar se vlera e mjeteve që diaspora  ka dërguar në vend nga janari deri në tetor të këtij viti ka arritur në një miliard e 200 milionë euro, lajmëroi korrespondenti i MIA-s nga Prishtina. 

 Sipas të dhënave statistikore për remitencat dhe institucionet e tjera financiare, që i ka publikuar sot Banka Qendrore e Kosovës (BQK), vlera e mjeteve që diaspora sivjet i ka dërguar qytetarëve të Kosovës në tetor 2023 është 110.5 milionë euro.

Hyrja më e madhe e remitencave të tilla, sipas BQK-së, ishte nga institucionet financiare jobankare, me pjesëmarrje prej 60.4 përqind, pasuar nga kanalet tjera me 24.2 për qind dhe bankat me 15.4 për qind. 

 Në njoftimin e sotëm të BQK-së jepen të dhëna edhe  për pasurinë e kompanive të sigurimeve, sipas të cilave vlera e tyre deri në shtator ka qenë 300.4 milionë euro, ndërsa mjetet e fondeve pensionale arritën vlerën prej 2.6 miliardë euro.

BQK-ja, gjithashtu,  publikoi se mjetet e ndërmjetësuesve të tjerë financiarë në fund të tetorit të vitit 2023 janë rritur për 17.6 milionë euro krahasuar me muajin paraprak, duke arritur vlerën prej 496.5 milionë euro.