Bruksel, 2 maj 2023 (MIA) - Në Bruksel filloi raundi i ri i dialogut midis Prishtinës dhe Beogradit me ndërmjetësimin e BE-së, ndërsa në të marrin pjesë kryeministri i Kosovës, Albin Kurti dhe presidenti i Serbisë, Aleksandar Vuçiq, në prani të përfaqësuesit të lartë të BE-së për Politikë të Jashtme dhe të Sigurisë, Zhozep Borell dhe të dërguarit special të BE-së për dialogun, Mirosllav Lajçak.

Delegacionet e Prishtinës dhe të Beogradit e miratuan Deklaratën për personat e zhdukur në Bruksel, ndërsa në vijim janë bisedimet për Asociacionin e Komunave Serbe (AKS).

I dërguari special i BE-së për dialogun midis Prishtinës dhe Beogradit, Mirosllav Lajçak deklaroi se statuti i Asociacionit duhet të jetë i pranueshëm për të dyja palët dhe në pajtim me standardet evropiane.

"Ekipi udhëheqës do ta prezentojë draftin. Ne nuk e dimë se çfarë është në të, por duhet të jetë fillimi i procesit. Në fund, duhet të kemi një statut të pranueshëm për të dyja palët, si për Kosovën ashtu edhe për Serbinë, në përputhje me standardet evropiane. Ky është hapi i parë i rëndësishëm", deklaroi Lajçak për agjencinë kroate të lajmeve Hina.

Ai potencoi se kjo është hera e parë të shihet puna e Ekipit udhëheqës, të cilin e përbëjnë katër persona të stacionuar në Kosovë, të cilët u angazhuan në mënyrë formale nga Qeveria e Kosovës, por u propozuan nga komunat me shumicë serbe.

Ai e përsëriti se BE-ja nuk dëshiron të krijojë Asociacion të Komunave serbe mbi një model që nuk është testruar deri më tani në botë, por në bazë të disa prej modeleve ekzistuese evropiane.