Uashington, 26 mars 2024 (MIA) - Qëndrimi i SHBA-së është se vendimi për mbajtjen e zgjedhjeve në Ukrainë, e cila po lufton kundër Rusisë në një luftë të paprovokuar, duhet të merret nga qytetarët e saj, raportoi Ukrinform, duke cituar zëdhënësin e Departamentit të Shtetit, Methju Miller.

"Në fund të fundit, këto janë çështje që duhet të vendosin ukrainasit, vuri në dukje Miller dhe shtoi se "SHBA-ja do të dëshironte që zgjedhjet të mbaheshin në Ukrainë në të gjitha nivelet siç kërkohet nga ligji".

"Por ne e kuptojmë se kjo është e vështirë të bëhet në kohë lufte. Kjo nuk është një çështje unike për Ukrainën. Kjo është një çështje që shqetëson çdo vend në luftë", theksoi Miller.

Në këtë drejtim ai theksoi vështirësitë e ushtarëve në front për të votuar, si dhe të njerëzve në territoret e pushtuara përkohësisht.

"Prandaj është një pyetje e vështirë. Dhe në fund, është një vendim që populli ukrainas duhet ta marrë vetë", shtoi zyrtari i Departamentit të Shtetit.

Zgjedhjet e fundit presidenciale dhe parlamentare në Ukrainë u mbajtën në vitin 2019.

Një zëdhënës i Departamentit të Shtetit tha gjithashtu se motivet e Putinit për të marrë kontrollin e Ukrainës nuk kishin ndryshuar.

"Ai dëshiron të pushtojë Ukrainën dhe të nënshtrojë popullin ukrainas", tha Miller.

Sipas tij, presidenti rus ka konfirmuar në 10 ditët e fundit se "nuk ka interes për negociatat me Ukrainën, sepse sheh mungesën e municioneve me të cilat po përballen ukrainasit". sa/

foto: Arkivi i MIA-s