Ankara, 25 shkurt 2023 (MIA) - Të paktën 184 persona, kryesisht kontraktorë ndërtimi, janë arrestuar në Turqi në lidhje me ndërtesat e rrënuara pas tërmeteve shkatërruese në pjesën jugore të vendit, tha sot Ministri i Drejtësisë Bekir Bozdag.

Prefekti i qarkut Nurdag në provincën Gaziantep u arrestua gjithashtu, raportoi Anadolia. Prefekti Okesh Kavak është nga partia në pushtet e presidentit Rexhep Taip Erdogan.

Qeveria e Erdoganit, e cila është në pushtet për më shumë se 20 vjet, është kritikuar për injorimin e standardeve të dobëta të ndërtimit, të cilat mund të kenë kontribuar në numrin e lartë të vdekjeve prej më shumë se 44,000 vetëm në Turqi.

Në 11 provinca turke, tërmetet vdekjeprurëse të 6 shkurtit, të ndjekur nga afër 10,000 pasgoditje, dëmtuan më shumë se 173,000 ndërtesa dhe lanë gati 2 milionë njerëz të pastrehë, sipas të dhënave të qeverisë.

Prej atëherë, rajoni më i gjerë është goditur nga tërmete të mëdha. Sipas agjencisë së fatkeqësive AFAD, lëkundjet pritet të vazhdojnë edhe për dy vitet e ardhshme në Turqi.

Një tërmet me magnitudë prej 5.2 ballë goditi sot provincën e Anadollit të Turqisë, Nigde, njoftoi Qendra e Monitorimit të Tërmeteve Kandili. AFAD tha se nuk raportohet për dëme.

Epiqendra e tërmetit ishte në rajonin Bor, rreth 350 kilometra në perëndim të rajonit kufitar turko-sirian të shkatërruar nga tërmeti.

Qyteti më i madh i Turqisë, Stambolli, ka nevojë për një program urbanizimi urgjent për të rindërtuar ose forcuar ndërtesat, me vlerë rreth 40 miliardë dollarë, thanë zyrtarët.

Një tërmet i mundshëm prej mbi 7.5 gradë do të dëmtonte rreth 500,000 ndërtesa, të banuara nga 6.2 milionë njerëz, rreth 40 për qind e popullsisë së qytetit, sipas një raporti të vitit 2021, raportoi DPA. sa/