Shkup, 30 korrik 2024 (MIA) - Drejtori i Qendrës për Menaxhim me Kriza (QMK), Stojançe Angellov përmes një video deklarate kumtoi se sot është aktivizuar përsëri mekanizmi i BE-së për mbrojtje dhe shpëtim dhe është kërkuar ndihmë nga aeroplanët.

Ai bëri të ditur se sot ka pasur më shumë se 30 zjarre në ambiente të hapura, prej të cilave 15 janë ende aktive. Ka thënë se moti i nxehtë dhe era vështirësojnë vënien në kontroll të zjarreve.

"Për fat të keq vazhdimisht shfaqen zjarre të reja. Moti i nxehtë dhe era shkaktojnë probleme në vendosjen e kontrollit të zjarrit", ka thënë Angellovi.

Ai ka drejtuar apel deri te të gjithë banorët që jetojnë në fshatrat gjysmë të braktisur që të evakuohen menjëherë nëse dëgjojnë se në afërsi të tyre ka ndonjë zjarr aktiv. Ai ka thënë se qytetarët të mos presin që zjarri të arrijë në fshat, përveç nëse nuk është organizuar mbrojtje në fshat nga ana e autoriteteve lokale.

"Të mos presin momentin e fundit dhe të mos ekspozohen ndaj ndonjë rreziku të panevojshëm për jetën e tyre. Do të ndërtohen shtëpi të reja, por jeta e njerëzve nuk mund të kthehet", apelon Angellovi.

Foto: arkivi i MIA-s