Скопје, 15 јануари 2025 (МИА) - Се уште не се знае дали претседателката на собраниската Комисија за социјална политика, демографија и млади Илире Даути ќе биде разрешена или самата ќе даде оставка од функцијата по петочната изгласана интерпелација против неа поднесена од пратеничката група на Левица. Преостанува за нејзината судбина да одлучи собраниската Комисија за прашања на изборите и именувањата откако вчера претседателот на Собранието Африм Гаши преку соопштение информира дека неговата улога како претседател завршила со процесот на интерпелација.

Претседателот на Комисијата за прашања на изборите и именувањата Ѓорѓија Сајкоски во изјава за МИА вчера нагласи дека Комисијата не е надлежна самата да презема чекори и оти чека следни чекори од пратеничките групи. Од пратеничката група на Левица вчера изјавија дека ќе чекаат неколку дена да се произнесе „Европскиот фронт“ од чии редови е Даути и доколку не поднесе самата оставка од фуникцијата, тие до Комисијата за избори и именувања ќе поднесат предлог за нејзино разрешување. Од „Европскиот фронт“ вчера за МИА истакнаа дека Даути ужива целосна политичка поддршка.

Гаши вчера информира дека неговата улога како претседател завршила со процесот на интерпелација на претседателката на Комисијата за социјална политика Илире Даути. Како што наведе Гаши, прашањата за разрешувања или оставки се во надлежност на Комисијата за прашања на изборите и именувањата, пратеничките групи или пратениците. 

- Како претседател на Собранието, мојата главна одговорност е да го почитувам и спроведувам Деловникот и процедурите на Собранието. Во овој контекст, интерпелацијата до претседателот на Комисијата за социјална политика, демографија и млади, г-ѓа Илире Даути, беше спроведена во целосна согласност со Деловникот, законите и Уставот. Важно е да се напомене дека интерпелацијата, по својата природа, не носи правни последици или ефекти. Мојата улога како претседател заврши по завршувањето на процесот на интерпелација, како што се случи во случајот со интерпелацијата поднесена против мене пред неколку месеци. Прашањата како што се разрешувања или оставки се процедури на Комисијата за прашања на изборите и именувањата, пратеничките групи или пратениците, вели Гаши.

Нагласува дека до него досега не е пристигнато официјално известување за оставка од ниту еден претседател на Комисија. 

- Од процедурална гледна точка, ова прашање е решено. Секое друго толкување освен ова е едноставно политичка реторика за дневна употреба и нема никаква правна основа, во која јас како претседател на Собранието нема да учествувам, вели Гаши.

Сајкоски вчера во изјава за МИА вели дека  Комисијата не е надлежна самата да презема нешто во врска со интерпелацијата на претседателката на Комисијата за социјална политика Илире Даути и дека нема добиено никакво известување досега. 

- Во заклучокот од Собранието се кажува дека наводите во интерпелацијата се основани, односно дека со 61 пратеник, претседателот на Комисијата е разрешен, во случајот г-ѓа Даути, бидејќи не ги исполнила деловничките одредби. Тоа е она што е суштината. Комисијата за прашања на изборите и именувањата не е надлежна самата да презема бидејќи не е ни повикана. Чекаме следни чекори од пратеничките групи, вели Сајкоски.

Според Сајкоски, интерпелацијата е висок морален чин на секој именуван функционер кој не ја исполнува законската обврска, односно смета дека Даути треба самата да си поднесе оставка.

Пратеничката група на Левица  ќе чека неколку дена да се произнесе „Европскиот фронт“ од чии редови е Даути и да види дали таа ќе поднесе оставка од функцијата, а доколку тоа не се случи, до Комисијата за праша на изборите и именувањата ќе поднесат предлог за нејзино разрешување.

- Ние мислиме дека е коректно на Даути да ѝ се даде неколку денови, со оглед на тоа дека „Европскиот фронт“ најави дека до четврток ќе излезе со соопштение што ќе прават дали ќе ја заменат или слично. Коректно е да ѝ се даде неколку денови таа доблесно да си даде оставка, затоа што нема никаква логика да продолжи да работи како претседателка на Комисијата, кога апсолутното мнозинство во Парламентот со 61 пратеник изгласале наводи коишто ја теретат дека работи неделовнички, незаконски и неуставно, изјави за МИА пратеникот Борислав Крмов од „Левица“.

За да ја предложи „Европскиот фронт“ повторно, Крмов нагласи дека потребно е таа да биде разрешена. Според него, поделени се мислењата во „Европскиот фронт“ во врска со Даути. 

– За да биде повторно предложена треба да биде разрешена. Ќе видиме што ќе направат, одредени политичари даваат одредени изјави, ако ја видите изјавата на лидерот на едното крило на Алијанса за Албанците, Зијадин Села, вели дека таа 100 проценти ќе остане и дека има полна поддршка, за после Илире Даути да излезе со две малку нејасни изјави кои инклинираат кон оставка, што е контрадикторно. Очигледно има поделени мислења во политичката група на „Европскиот фронт“, со оглед на тоа дека се повеќе политички субјекти. Нека одлучат тие што ќе прават, а според тоа, ние ќе се поставиме, рече Крмов.

Потпретседателот на Демократската унија за интеграција (ДУИ) која е дел од „Европскиот фронт“, Арбр Адеми вчера во изјава за МИА вели дека Даути ужива целосна поддршка од пратеничката група на Европскиот фронт, како и целосна политичка поддршка.

– Пратеничката Илире Даути ужива целосна поддршка од пратеничката група на „Европскиот фронт“, исто така има и целосна политичка поддршка. Она што се случи во Собранието на пленарната седница е идеополитичка диференцијација, со употреба на мајоризација, метод кој припаѓа на минатото, вели Адеми во изјавата за МИА.

На прашањето дали се очекува „Европскиот фронт“ да одржи состанок на кој ќе одлучи во врска со тоа дали Даути ќе остане, ќе се повлече или, пак, можеби повторно ќе биде предложена од страна на „Европскиот фронт“ за претседателка на Комисијата, Адеми не прецизираше. 

– За поддршката на Илире Даути воопшто не треба да се одржи состанок, тоа е ноторно дека ужива целосна политичка поддршка, рече Адеми. 

Од владејачката  ВМРО-ДПМНЕ вчера оценија дека Илире Даути нема кредибилитет да претседава со собраниската Комисија за социјална политика, демографија и млади, откако беше изгласана недоверба по расправата за интерпелација покрената од пратеничката група на Левица.

-Не е важно кој покренал интерпелација и која била темата или причината, важно е дали е прекршен Деловникот за работа на Собранието или не е, рече на прес-конференција пратеникот и член на ИК на ВМРО-ДПМНЕ, Миле Лефков.

Од опозициската СДСМ  завчера го повикаа Гаши да ги каже следните чекори по интерпелацијата на Даути, додека од Движењето ЗНАМ, кое е дел од владината коалиција, побараа од „Европскиот фронт“ да предложи нов претседател на Комисијата бидејќи претседателското место во оваа Комисија му припаѓа на „Европскиот фронт“.

Интерпелацијата за претседателката на собраниската Комисија за социјална политика, демографија и млади, поднесена од пратеничката група на Левица, беше изгласана во петокот со 61 глас „за“ обезбедни преку пратениците на Левица, ВМРО-ДПМНЕ и ЗНАМ. Албанскиот блок беше против интерпелацијата, додека пак, пратеницте на СДСМ, иако нивен е законот за бранители, излегоа од салата. Потоа, Кабинетот на претседателот на Собранието излезе со соопштение во кое наведе дека интерпелацијата нема правно-обврзувачки последици. фф/мд/

Фото: МИА Архива