Софија, 24 февруари 2026 (МИА) - Директорот на македонскиот Културно-информативен центар во Софија, Зоран Пејковски, оствари средба со градоначалникот на општина Новаци, Стевче Стевановски, на која се разговарало за улогата на културата како темел на националниот идентитет.

- На средбата се отворија прашања што навлегуваат во суштината на културната мисија на институциите. Разговорот беше насочен кон иднината, односно кон тоа како локалната самоуправа, кога е раководена од висока свест за сопствената културна улога, може да стане активен фактор во меѓународната афирмација на државата зашто во времиња кога идентитетот се гради и брани преку вредности, а не преку реторика, културата останува најдостоинствениот и најблагороден амбасадор на една нација - стои во соопштението на Пејковски до медиумите.

Пејковски му врачил плакета на градоначалникот Стевановски, што претставува признание за неговата посветеност и континуираната поддршка на македонската култура во странство. 

- Плакетата го означува неговиот придонес во афирмацијата на македонските културни вредности, во градењето духовни и интелектуални мостови меѓу народите и во унапредувањето на културната дипломатија како инструмент на дијалог, пријателство и заемна почит. Овој гест добива уште поголема тежина ако се има предвид дека средбата се одржа во годината кога се одбележуваат 20 години од основањето на македонскиот КИЦ во Софија - јубилеј што претставува симбол на институционална зрелост, континуитет и посветена работа - стои во соопштението.

На средбата исто така се разговарало за конкретни иницијативи, за потенцијалите на Општина Новаци како простор со богато културно и историско наследство, како и за можностите за нивна презентација на меѓународната сцена преку платформите на Македонскиот културно-информативен центар во Софија.

- Заедничката определба е јасна: културата не смее да биде маргинална активност, туку државотворна мисија. Таа е простор каде што се создаваат вредности, каде што се обликува колективната меморија и каде што се изразува современата креативна енергија. Македонската традиција и современото творештво имаат свое достоинствено место на меѓународната сцена - не како формалност туку како суштински придонес кон европскиот и светскиот културен мозаик - стои во соопштението.

Пејковски во соопштението додава дека во текот на изминатите две децении македонскиот КИЦ во Софија се изгради во респектабилен културен простор, препознатлив по својата програмска содржина и по својата доследност во мисијата. Преку многубројни изложби, концерти, книжевни вечери, научни трибини и мултимедијални проекти тој стана автентичен прозорец кон македонската духовност и креативност. нд/лв/

Фото: Зоран Пејковски