Скопје, 14 мај 2025 (МИА) - Претседателката Гордана Сиљановска-Давкова остварила средба со специјалната пратеничка на Обединетото Кралство за Западен Балкан, Карен Пирс чија посета ја оценила како јасен показател за британската заинтересираност и посветеност на Западен Балкан.

Според Сиљановска-Давкова, оценувањето на напредокот треба да биде меритократско, со фокус на исполнувањето на Копенхагенските критериуми. Сиљановска-Давкова, како што соопштија попладнево од нејзиниот Кабинет, укажала на деструктивноста на билатерализацијата на преговарачкиот процес под закана со вето. 

Информирала за заситеноста и заморот на македонските граѓани од бројните преседани, блокади и двојни стандарди. За неа, спротивно на европските темелни вредности и принципи е негирањето на националниот и културниот идентитет, како и непочитувањето на дигнитетот и интегритетот на македонските граѓани.

Можно надминување на блокадата, како што се наведува во соопштението, претседателката гледа во креативно толкување на Преговарачката рамка и надлежноста на Мешовитата комисија за историски и образовани прашања. 

Специјалната пратеничка Карен Пирс изразила разбирање за потребата од надминување на македонската евроинтеграциска блокада. 

Соговорничките ја оцениле британско-македонската соработка како успешна, изразувајќи подготвеност за нејзино продлабочување и проширување. Двете очекуваат важни придобивки за регионот од претстојниот Самит на Берлинскиот процес во Лондон. бак/

Фото: Кабинет на претседателката Сиљановска-Давкова