Вашингтон, 9 април 2026 (МИА) - Жена која мислела дека засекогаш го изгубила вредниот златен приврзок останала во шок кога тој се појавил повеќе од десет години подоцна - и тоа на сосема очигледно место. Своето необично искуство таа го споделила на социјалната мрежа Тредс, каде што нејзината објава за кратко време привлекла големо внимание од јавноста.

- Овој приврзок го изгубив пред повеќе од 10 години. Токму сега го најдов на средина од тепихот во пералната, напишала таа на 7 април, објавувајќи фотографија од приврзок во форма на срце со аметист поставен во златна рамка.

Објавата за кратко време собрала повеќе од 53.000 лајкови и поттикнала илјадници корисници да споделат сопствени искуства со изгубени предмети кои, по долг временски период, повторно се појавиле под необични и тешко објасниви околности. Во коментарите, многумина истакнале колку силно ги погодило повторното пронаоѓање на нешто за кое со години верувале дека е засекогаш изгубено. Еден корисник ја споделил својата приказна за венчалниот прстен што го изгубил, а кој му бил вратен години подоцна, по значајна животна промена.

- Еднаш го изгубив венчалниот прстен. Се преселив во Јапонија на четири години, потоа се вратив во САД и додека се вселувавме во новата куќа, некој ми пријде и ми рече: Еј, штотуку го најдов ова на земја. Дали е ваше? Тоа беше мојот венчален прстен, напишал тој. Друга корисничка раскажала за губење на скапоцена обетка и не верувала кога повторно ја видела, иако околностите не укажувале на тоа дека може да се најде токму таму.

- Изгубив голема златна обетка. Тоа беше дел од првиот и единствен пар вистински златни обетки што некогаш сум ги имала. Бев скршена, долго штедев за нив. Еден ден, додека седев во црква, ми пријде еден редар и ме праша: Дали е ова ваше?‘ Тоа беше мојата обетка. А не ги носев во црква тој ден кога ја изгубив, напишала таа. мв/сд/

Фото: Тредс