Shkup, 20 shtator 2024

Ziadin Sela me urdhër të Ali Ahmetit ka dy ditë që po përpiqet të mbulojë disfatën e tyre. Njoftimet se do të propozojnë Ligjin për përfaqësim të drejtë duken tejet joserioze.

Të ishin të aftë, do ta kishin zgjidhur këtë çështje kur ishin në pushtet. Vendimi i Gjykatës Kushtetuese për ngrirjen e Balancuesit,  është një  konfirmim se BDI në vend që të përdorë funksionet në Qeveri me LSDM-në e delegjitimuar për zgjidhje sistematike të statusit të shqiptarëve, iu përkushtua grabitjes së parasë publike dhe pasurimit personal.

Çdo ditë konfirmohet se gjithçka që është bërë gjatë regjimit të tyre është sipërfaqësore, me motive populiste dhe për pikë politike ditore. Gjykata Kushtetuese, përbërja aktuale e së cilës u votua pikërisht me votat dhe ndikimin e BDI-së, ngriu përdorimin e Balancuesit, gjë që
paraqet një tjetër disfatë programore dhe kadrovike të politikave të BDI-së.

Ky fakt nuk mund të fshihet me justifikimin se shumica e Badenterit duhet të futet në Gjykatën Kushtetuese. Koalicioni VLEN u shpreh qartë se Balancuesi është një koncept joefektiv, sepse u bë mjet për keqpërdorime që kur maqedonasit filluan të deklarohen si shqiptarë për t'u punësuar në administratën publike.

Prandaj, ne jemi duke hartuar një ligj për përfaqësim të drejtë, të cilin do ta vëmë në shqyrtimin e publikut ekspert me debat  publik,  për të marrë një zgjidhje efikase dhe të qëndrueshme që do të jetë plotësisht e zbatueshme në praktikë dhe do t'u mundësojë shqiptarëve të
punësohen në  institucionet shtetërore në bazë të  aftësive profesionale dhe jo për shkak të përkatësisë partiake.

Ngrirja e balancuesit nuk do të pengojë punësimin e shqiptarëve në organet e administratës shtetërore edhe në këtë periudhë të vakumit ligjor, sepse është një nga parimet e Marrëveshjes Kornizë të Ohrit dhe kategori kushtetuese.

Koalicioni VLEN

__________________________________________________________________________________________________

MIA këto tekste i publikon në formën integrale dhe origjinale dhe nuk mban përgjegjësi për përmbajtjen e tyre dhe as për mangësitë eventuale drejtshkrimore apo gabimet e shtypit.