Shkup, 6 dhjetor 2024 (MIA) - Bashkëpunimi dhe partneriteti që lidh njerëzit nga vende dhe kultura të ndryshme inkurajojnë mirëkuptimin e ndërsjellë, përballjen me sfida të ndryshme dhe mundësojnë prosperitet të përbashkët. Angazhimi i vullnetarëve është një shembull i fuqisë së një bashkëpunimi të tillë. Për gati tre dekada, ata kanë investuar përvojën e tyre në ndërtimin e gjeneratave të studentëve me njohuri dhe aftësi më të mëdha, për çka ne jemi shumë mirënjohës, tha sot ministrja e Arsimit dhe Shkencës Vesna Janevska, në manifestimin me rastin e betimit të 36 vullnetarëve të rinj të Korpusit të Paqes në Shkup.

Vullnetarët e rinj do t'i bashkohen grupit prej më shumë se 900 vullnetarësh që kanë shërbyer në Maqedoninë e Veriut. Ky është grupi i njëzet e shtatë që do të jetojë dhe do të punojë në vendin tonë që nga hapja e zyrës së parë të Korpusit të Paqes në Shkup në vitin 1996.

Manifestimi i sotëm shënoi përfundimin me sukses të trajnimit intensiv 11 javor në të cilin vullnetarët studiojnë gjuhën dhe kulturën maqedonase dhe atë shqipe.

Pas dhënies së betimit, vullnetarët e rinj të Korpusit të Paqes do të fillojnë shërbimin e tyre dyvjeçar në komunitetet në të gjithë Maqedoninë e Veriut. Ata do të punojnë si mësues të anglishtes së bashku me mësuesit lokalë të anglishtes dhe disa prej tyre do të shërbejnë si specialistë të zhvillimit të komunitetit që punojnë me organizata dhe bashki të ndryshme. 

Në fjalën e saj, ministrja Janevska informoi se vullnetarët do të ndihmojnë në mësimin e gjuhës angleze në 17 shkolla. Ajo tha se beson se ata do ta duan vendin tonë dhe do të investojnë të gjitha njohuritë dhe aftësitë e tyre për të ndihmuar nxënësit që të zotërojnë gjuhën angleze.

“Sot përshëndesim dhe mirëpresim 36 nga miqtë tanë të rinj, disa prej të cilëve fillojnë të punojnë vullnetarë në 17 shkolla të shpërndara në komunitete të ndryshme lokale të vendit tonë të bukur. Besoj thellësisht se shqetësimi i largimit nga familja dhe miqtë dhe komoditeti i shtëpisë do të zëvendësohen dita-ditës në dy vitet e ardhshme me gëzimin e njohjes me një kulturë të re, zakone dhe njerëz të rinj, të cilët janë pasuria jonë më e madhe. Nuk kam dyshim se vullnetarët e rinj, të përzgjedhur me rekomandime të shkëlqyera, trajnimet që kanë pasur këtu do të jenë një ndihmë e madhe për komunitetet, ku do të punojnë si të gjithë paraardhësit e tyre”, tha Janevska.

Ajo shtoi se bashkëpunimi me mësuesit e gjuhës angleze në shkolla jo vetëm që do të forcojë aftësitë gjuhësore të nxënësve, por edhe do të nxisë kuriozitetin e tyre përmes lojërave, tregimeve, aktiviteteve praktike dhe metodave të tjera kreative për të mësuar një gjuhë të huaj.

Sipas ministrit të Vetëqeverisjes Lokale, Zoran Perinski, vullnetarët meritojnë një vend të veçantë për shkak të vendosmërisë dhe përkushtimit të tyre personal për të ndarë njohuritë dhe përvojën e tyre të fituar në Shtetet e Bashkuara të Amerikës me qytetarët e vendit tonë dhe për të ndihmuar me vetëmohim.

“Qytetarët e Maqedonisë kanë ndërtuar marrëdhënie të forta miqësore me popullin amerikan me dekada. Së bashku ne realizojmë shumë projekte të përbashkëta, të financuara drejtpërdrejt nga taksapaguesit e Shteteve të Bashkuara, projekte që kanë një ndikim të madh në jetën e qytetarëve tanë. Korpusi i Paqes ka qenë i pranishëm në vend për gati tre dekada dhe ka dhënë një kontribut të madh në forcimin e miqësisë. Qëndrimi dhe puna e më shumë se nëntëqind vullnetarëve në vend është më shumë se një numër mbresëlënës. Këto janë shumë miqësi të tjera, disa të qëndrueshme, përmes të cilave zgjerohet rrjeti i miqve dhe dashamirësve tanë, tha Perinski në fjalimin e tij sot.

Siç tha ai, deri më tani janë përfshirë 91 vullnetarë në 49 komuna. Ai theksoi se falë përkushtimit të tyre janë organizuar shumë kurse për mësimin e gjuhës angleze, janë realizuar një numër i madh i aksioneve humanitare, të cilat janë në bashkëpunim të drejtpërdrejtë me sektorin civil.

“Kohët e fundit vihet re bashkëpunimi me sektorët për zhvillim lokal dhe ekonomik dhe sigurisht me qendrat për zhvillim rajonal. Në nivel lokal, mundësitë për hartimin dhe zbatimin e aktiviteteve të përbashkëta janë të mëdha. Njerëzit tanë janë gjithmonë mikëpritës dhe me zemër të hapur për mysafirët që vijnë me qëllime të mira. Dyert janë të hapura për vullnetarë të rinj në komunat Rosoman, Pehçevë dhe Zërnovci”, shtoi Perinski.

Ambasadorja e SHBA-së në vend, Angela Ageler, tha se vullnetarët do të vazhdojnë të punojnë shumë dhe të bëjnë përshtypje me përkushtimin e tyre si ambasadorë të Shteteve të Bashkuara të Amerikës në këtë vend.

“Në rolin tim si ambasador, si dhe gjatë angazhimit tim të mëparshëm në Maqedoninë e Veriut, pata mundësinë të dëshmoj entuziazmin dhe energjinë e vullnetarëve të Korpusit të Paqes në veprim. Unë i ndjek vullnetarët ndërsa ata punojnë në shkolla, shoqata qytetare, organizata, komuna, kampe verore dhe në komunitetet e tyre, ku ata jetojnë dhe punojnë”, shtoi Ageler.

Sipas ambasadores, vullnetarët përfaqësojnë më të mirën nga ajo që Amerika i ofron botës, dhe ajo që është edhe më e rëndësishme, ata do të marrin me vete më të mirën nga ajo që Maqedonia e Veriut i ofron botës.

“Ata ndërtojnë ura mes njerëzve të dy vendeve tona që zgjasin me vite dhe vazhdojnë të ekzistojnë edhe kur vullnetarët mbarojnë shërbimin e tyre. Misioni i Korpusit të Paqes është promovimi i paqes dhe miqësisë. Kur Presidenti Xhon Kenedi nënshkroi legjislacionin 63 vjet më parë për të krijuar Korpusin e Paqes, ai parashikoi angazhimin kryesor të vullnetarëve si sjelljen e paqes dhe miqësisë dhe promovimin e lidhjeve midis SHBA-së dhe botës”, shtoi Ageler.

Siç u përmend, ky synim sot është po aq i rëndësishëm sa edhe në të kaluarën.

“Do të mësosh aq shumë nga kjo përvojë, do të zbulosh se je më i fortë se sa ishe - të paktën kështu u ndjeva unë dhe ndikimi yt do të lërë gjurmë si tani ashtu edhe në të ardhmen. Mezi pres t'ju vizitoj në vendet tuaja, në të gjithë këtë vend të bukur”, tha ambasadorja.

 Foto: MIA