Tetovë, 30 nëntor 2023 (MIA) - Tri ditë me radhë janë në grevë punonjësit nga "Higjiena Komunale" në kuadër të Ndërmarrjes Publike Komunale (NPK) Tetovë për shkak të mospagesës së pagave dhe për këtë arsye nuk pastrohen mbeturinat nga kontejnerët. 

"Tri ditë me radhë vijmë në rrethin e 'Higjienës Komunale' në kuadër të NPKTetovë afër vendbanimit Teçe dhe nuk dalim në terren, ulemi këtu dhe mbajmë grevë. Kështu do të jetë ashtu siç e kemi paralajmëruar që në ditën e parë për sa kohë të mos ketë pagesa të pagave dhe kontributeve të mbetura. Deri atëherë, mbeturinat nuk do të grumbullohen. Jemi në kontakt me drejtorinë dhe përfaqësuesit e kompanisë sllovene që duhet të na marrë përsipër. Nga sllovenët morëm premtim se paga për punën në dhjetor do të paguhet rregullisht në janar. I mbetet komunës dhe drejtorisë të paguajnë pagat e mbetura", informuan punëtorët e "Higjienës Komunale".

Pas fillimit të grevës të martën, Komuna e Tetovës u ka dërguar një letër mediave në të cilën sqaron se do të sigurojë pagesën e pagave të mbetura. Sipas tyre, krijimi i dy ndërmarrjeve të reja komunale dhe bashkëpunimi me kompaninë sllovene përmes partneritetit publik privat është mënyra për të siguruar një zgjidhje të përhershme. fc/

Fotografia: MIA