Rali, 22 gusht 2024 (MIA) – Në tubimin e parë publik në vend të hapur pas përpjekjes për atentat në muajin e kaluar, Donald Trampi u shfaq pas xhamit antiplumb në tubimin në Karolinën e Veriut në një ngjarje kushtuar sigurisë kombëtare. Në fjalimin e tij, ai e quajti paraardhësin e tij Barak Obama “të ndyrë” për shkak të komenteve të tij natën e kaluar në Konventën Kombëtare Demokratike. 

Trampi i akuzoi presidentin Xho Bajden dhe nënpresidenten Kamalla Harris për tërheqjen vdekjeprurëse nga Afganistani dhe për luftërat në Ukrainë dhe Lindjen e Afërt, përderisa vazhdimisht kthehej në tubimin demokratik në Çikago, ku folësit e prezantuan Trampin si kërcënim për vendin nëse përsëri zgjidhet president. 

Ish-presidenti, i cili tani është i nominuar nga Partia Republikane, e pyeti publikun e mbledhur në Muzeun e Aviacionit dhe Shtëpinë e të Famshmëve në Karolinën e Veriut nëse i kishin parë fjalimet e ish-presidentit Obama dhe ish-zonjës së parë Mishell Obama të martën mbrëma. “Ata po sulmonin presidentin tuaj. Gjithashtu Mishell. E dini, ata gjithmonë më thonë: 'Zotëri, rrini pas politikës. Mos u bëni personal.' E megjithatë, ata ishin personalë gjatë gjithë natës," tha ai, duke pyetur: "A duhet t'i përmbahem politikës?"

Trampi, i cili përballet me Harrisin në zgjedhjet në nëntor pasi Bajdeni u tërhoq, foli pas foltores së rrethuar me panele nga xhami antiplumb, të cilët formuan mur mbrojtës në skenë – pjesë e masave të rritura të sigurisë të dedikuara për mbrojtje të tij pas përpjekjes për vrasje nga ana e një sulmuesi nga Pensilvania më 13 korrik. 

Kontejnerët e magazinimit u vendosën rreth perimetrit për të krijuar mure shtesë dhe për të bllokuar dukshmërinë. Snajperët u pozicionuan në çatitë e lokalit, ku aeroplanë të vjetër u vendosën pas podiumit dhe një flamur i madh amerikan ishte varur në vinça.

Ngjarja, e cila ishte paralajmëruar se fokusohej në çështjet e sigurisë kombëtare, ishte pjesë e një serie njëjavore të ngjarjeve kundër fushatës së Trampit gjatë Konventës Kombëtare Demokratike, e cila po mbahet në Çikago. Mbështetësit po i kërkojnë atij që të fokusohet në politikë dhe jo në sulme personale kundër Harris, ndërsa ai përpiqet të përshtatet me tërheqjen e Bajdenit nga gara.

Nata e dytë e konventës demokratike të martën ishte shumë energjike, me fjalime nga Mishell dhe Barak Obama, të cilët ashpër e sulmuan Trampin. “Pikëpamja e tij e kufizuar dhe mendjengushtë për botën e bëri atë të ndihej i kërcënuar nga ekzistenca e dy njerëzve punëtorë, me arsim të lartë dhe të suksesshëm, të cilët ndodhin të jenë me ngjyrë”, tha Mishell Obama.

Barak Obama u tall me obsesionin e Trampit me numrat e tubimeve dhe e quajti atë "një miliarder 78-vjeçar, i cili nuk ka reshtur së ankuari për problemet e tij që kur zbriti nga shkallët lëvizëse të artë nëntë vjet më parë". “Është një lumë i vazhdueshëm ankesash dhe vërejtjesh, i cili në fakt është përkeqësuar tani që ai ka frikë të humbasë nga Kamala”, tha ish-presidenti.

Në vërejtjet e tij, Trampi e përshkroi Harrisin si “personalitetin më radikal nga e majta e cila ndonjëherë është kandiduar për funksion të lartë politik në vendin tonë “dhe tha se gruaja të cilën tani e quan “mikja Kamalla” do ta shkatërrojë vendin nëse zgjidhet presidente e SHBA-së. 

Edhe pse Trampi e pranon se gara është më afër se sa ishte para se Bajdeni të tërhiqej, ndihmësit e tij besojnë se Harrisi mbetet relativisht i panjohur dhe se përpjekjet për të nxjerrë në pah deklaratat e saj të kaluara dhe pozicionet që ajo ka marrë në garat e mëparshme do të zmbrapsin votuesit e pavendosur pas përfundimit të "muajit të mjaltit".

Trampi vazhdimisht e përmendte tërheqjen e administratës së Bajdenit nga Afganistani dhe tha se, nëse fiton, do të kërkojë dorëheqje nga çdo funksion i lartë ushtarak që ishte i përfshirë. 

Ai u zotua të "heqë teorinë kritike të racës dhe çmendurinë transgjinore nga forcat tona të armatosura të SHBA-së, gjatë administratës së tij, ai vendosi një politikë në Pentagon e cila në masë të madhe i pengonte personat transgjinorë të shërbejnë në ushtri, gjë të cilën Bajdeni e shfuqizoi.

Trampi, gjithashtu, premtoi investime të mëdha në forcat e armatosura dhe tha se do ta nis përpjekjen më të madhe të rekrutimit në historinë e vendit në kohë paqeje.

Do të jetë aq e nxehtë sa do të dua të jap dorëheqje dhe të bashkohem me ushtrinë, tha Trampi, i cili ka marrë një sërë shtyrjesh për të shërbyer në ushtri, duke përfshirë një të marrë me letrën e një mjeku ku thuhej se ai vuante nga kulmet në këmbët e tij për shkak se ai nuk ishte i përshtatshëm për ushtri. fc/

Fotografia: EPA