Shkup, 7 prill 2024 (MIA)- Lidhur me arrestimin e personit F.S. nga Shkupi, informoj opinionin se i njëjti është rezultat i sulmit ndaj policëve, pjesëtarëve të Njësisë për intervenim të shpejtë të cilët ishin angazhuar për ruajtjen e rendit dhe qetësisë publike në një ndeshje futbolli që u vlerësua si e rrezikshme për sigurinë dhe të cilët në momentin e sulmit nga personi i përmendur ka ndërhyrë sepse ka pasur tentativë që publiku vendas të konfrontohet me lojtarët mysafirë.

Këtë e ka bërë të ditur ministri i Punëve të Brendshme, Pançe Toshkovski pasi një pjesë e mediave publikuan se njësitet speciale kanë arrestuar gazetarin dhe pronarin e portalitX, Furkan Saliu.

"Pas arrestimit të personit F.S. një makinë në pronësi të tij është kontrolluar dhe në të është gjetur një armë. Ai u ndalua nga efektivët e policisë, ku do të bëhet intervistimi dhe do të ndërmerren të gjitha masat dhe aktivitetet e nevojshme për zbardhjen dhe dokumentimin e plotë të ngjarjes. Dua të theksoj se i kuptoj shqetësimet e Shoqatës së Gazetarëve dhe Sindikatës së Gazetarëve, por Ministria e Punëve të Brendshme duhet të trajtojë në mënyrë të barabartë këdo që sulmon një punonjës policie, sipas procedurave të përcaktuara ligjore. Si ministër deri më tani kam dëshmuar se qëndroj për transparencë dhe llogaridhënie për punën e MPB-së dhe kështu do të mbetet, por ligjet në vend duhet të vlejnë për të gjithë njëlloj", ka thënë Toshkovski.

Në këtë kontekst, shton ai u bëj thirrje partive politike, shoqatave, sindikatave dhe të gjithë faktorëve të tjerë relevant që të përmbahen nga deklaratat dhe njoftimet që bëjnë presion mbi policinë dhe t’i lënë punonjësit e policisë të bëjnë punën e tyre në mënyrë profesionale, pa politikë dhe vetëm në përputhje me Ligjin.

"Publiku do të njoftohet plotësisht për të gjitha detajet lidhur me këtë rast sapo të përfundojë hetimi", ka thënë ai.

Foto: arkivi i MIA-s