Shkup, 9 mars 2023 (MIA) - Besohet se tetë deri në 10 për qind e popullatës së përgjithshme kanë një shkallë të caktuar të sëmundjes kronike të veshkave. Në fazat e hershme, sëmundja është pa simptoma, shfaqet në heshtje dhe pacientët as që e dinë se e kanë. Mjekët rekomandojnë ekzaminime të rregullta parandaluese që mund të zbulojnë sëmundjen në fazat e hershme dhe në këtë mënyrë të parandalojnë përparimin e saj.

"Shkaktarët më të shpeshtë të kësaj sëmundjeje janë tensioni i lartë i gjakut – hipertensioni arterial dhe diabeti. Me trajtimin e tyre në kohë dhe korrekt do të parandalojmë zhvillimin e sëmundjeve kronike të veshkave, thotë drejtoresha e Klinikës së Nefrologjisë, Irena Rambabova Bushletiq, në deklaratë për MIA-n.

Në vendin tonë, numri i pacientëve që kanë nevojë për trajtim kronik të hemodializës varion nga 1300 deri në 1600 persona.

"Të dhënat statistikore të vitit 2021 tregojnë se në vendin tonë janë rreth 1.390 pacientë në hemodializë", thotë Rambabova-Bushletiq.

Përveç Klinikës së Nefrologjisë, ku çdo ditë trajtohen pacientë që i nënshtrohen dializës, trajtimi i hemodializës kryhet edhe në disa qendra të tjera të dializës në mbarë vendin, si Diaverum, Nefroplus dhe Diames, Instituti i Nefrologjisë në Strugë, si dhe ka qendër dialize edhe Spitalin e Përgjithshëm të Qytetit "8 Shtatori".

Për transplantim presin nga 130 deri në 160 pacientë 

Lista e pritjes për transplantin e veshkave varion nga 130 deri në 160 pacientë, por ky numër, siç thekson drejtoresha e Klinikës së Nefrologjisë, është i ndryshueshëm pasi rinovohen vazhdimisht ekzaminimet e marrësve të mundshëm të veshkave.

Deri më tani në vendin tonë janë kryer transplantime te 250 pacientë, ndërsa numri më i madh i ndërhyrjeve të tilla nga një donator i vdekur janë kryer në vitin 2021.

Është domethënëse se viti 2021 është viti me numrin më të madh të transplanteve të kryera nga një dhurues i vdekur (16), në kushtet e funksionimit të sistemit shëndetësor gjatë pandemisë COVID. Në periudhën 2020-2022 janë kryer gjithsej 62 transplante veshkash. Nga numri i përgjithshëm, 30 janë veshka të marra nga një donator i vdekur, sqaron për MIA-n Rambabova Bushletiq.

Në mars shënimi tradicional i Ditës Botërore të Veshkave

Që nga viti 2006, Dita Botërore e Veshkave shënohet tradicionalisht çdo vit të enjten e dytë të marsit me një moto të ndryshme për të theksuar problemet më të theksuara me të cilat përballen pacientët me sëmundje të veshkave, por edhe për të diskutuar për parandalimin. Motoja e këtij viti është “Veshka të shëndetshme për të gjithë”. Të presim të papriturën - t'i mbrojmë më të cënuarit!”.

Në kuadër të shënimit të sotëm të Ditës Botërore të Veshkave janë paralajmëruar ngjarjen në organizim të Klinikës për Nefrologji dhe Shoqatës e të sëmurëve me veshka “Nefron”.

Blazhe Darudov

Foto: MIA arkiv